اینگیلیسجه century سؤزونون آنلامی رسمی دیلده "عصر"، آنادولو تورکجه‌سینده "یوز ایل" فارسجادا ایسه "قرن، سده"دیر. "عصر" سؤزونون فارسجا معناسی بام باشقا‌دیر. اؤرنه‌یین، "عصر اتم" ترکیبی، بیزده "آتوم دؤورو" یا "اتم دؤنمی" کیمی سسله‌نیر. بو سؤزون اینگیلیسجه قارشیلیغی age ‌دیر. بونونلا بئله، بیز century سؤزونون قارشی‌لیغی اولا‌راق "یوٍزایللیک" ایصطیلاحینی اؤنرمیشیک، age سؤزونون قارشیلیغی اولا‌راق ایسه "دؤنم" سؤزونو قوللانیریق:

21ـ‌جی یوٍزایللیک XXI century

عاقل دؤنمی Age of reason

هابئله اورتاچاغین بیرینجی یاریسی و یا بوٍتونو بعضی قایناق‌لاردا "ایمان"، بعضی‌لرینده ایسه "قارانلیق" صیفتی ایله آد چکیرلر:

ایمان دؤنمی Age of faith

قارانلیق دؤنم‌لر Dark ages

آوروپا 17ـ‌جی یوٍزایللییین ایکینجی یاریسیندان باشلانمیش فیکیر آخیمی "آیدینلانما"* کیمی سسله‌نیر. رسمی دیلده بونا معاریف‌چی‌لیک دؤنمی دئییلیر.

Age of Enlightenment

* آذربایجان معاریف‌چی‌لیک دؤنمی آوروپانینکیندان سئچیلیر. بو دؤنم اون‌دوققوزونجو عصردن (داها چوخ ایکینجی یاریسیندان) باشلاییر، 1917ـ‌جی ایله‌دک، (اوکتیابر دئوریمینه‌جن) داوام ائدیر.