دئدی: «هفته‌ده بیر گون بئش- آلتی ساعات یول گلیریخ اوغلوموز تبریزده‌کی بو مؤسسه‌ده دیل مهارتلری اؤیرنسین.دیل مهارتلرینی اؤیرنه بیلسه عادی مدرسه ده درس اوخویا بیلر.»

اوشاقلارا باخدیم. قیز ساریشین ایدی، اوغلان ایسه اسمر. اوغلان قیزدان بؤیوک نظره گلیردی.

دئدی: «اوچ یاشلاری وار، اکیزتایی‌دیلار. بیر یاشلاری وار ایدی به‌خود اولدوق قیز ائشیدیر، اوغلان ائشیتمیر. کئچن ایل آپاردیق تهراندا قولاغینا حلزون أکدیلر. ایندی قولاغینین دالیسینداکی سمعک کیمی سیستم واسیطه‌سی ایله سس قولاغینا چاتیز، أکیلمیش حلزون ائله او آندا سسی بئینینه منتقل ائدیر. اونا گؤره قولاقلارینا حلزون أکیلمیش‌لرین ائشیتمک‌لری بیراز بیزلردن فرقلیدی.»

اؤز یانیمدا دئدیم: «گؤره‌سن قیز ایله اوغلانین یئری ده‌ییشیلسه ایدی یئنه ده قیزین قولاغینا حلزون أکدیریب، هفته ده بئش- آلتی ساعات یول گلردیلر؟» آمما در حال جنسیتی اؤلچو ایله بئله بیر مسئله‌یه یاناشماغیما گؤره اؤزومو قینادیم. دئدیم: «ایندی باجیسی کیمی ائشیدیب، دانیشا بیلیر؟»

دئدی: «ائشیدیر آمما هله یاخچی دانیشا بیلیمر. بورانین کیلاسلاری فارسی دیلینده‌دی. نئچه دفعه معلیمینه دئمیشم بیزیم یاشادیغیمیز محیطده هامی تورکو دیلینده دانیشیر. اوشاق یاشیدلاریینان رابیطه قورا بیلمیر. نئچه دفعه خواهش ائله‌میشم دیل مهارتلرینی منیم اوغلوما آنا دیلینده اؤیرتسینلر، آمما معلیمی قبول ائله‌میر. گویا بو مؤسسه پایتختده کی مرکزین نظارتی آلتیندا دولانیر. ایندی مجبور اولموشوق اؤزوموز ائوده فارسی دیلینده دانیشیریق بلکه اوغلوموز دیل مهارت‌لرینی اؤیرنسین. آمما یئنه ده اولمور. من دئییرم نان، آناسی دئییر نان، منیم آنام دئییر چؤرک، آتام دئیر چؤرک، خالاسی دئییر چؤرک، قونشونون اوشاغی دئییر چؤرک...»

...

گؤره‌سن دونیانین آیری اؤلکه‌لرینده بئلنچی اوشاقلارا هانسی دیل و هانسی شیوه ایله دیل مهارتلرینی درس وئریرلر؟