اوستاد شهریارین شعرلرینده چوخلو تاریخی، میفیک حتی افسانه‌وی شخصیت‌لرین آدی گلیبدیر. آنجاق، او زامان کی اوستاد شهریار اؤزونه قاییدیر، او زامان کی اوستاد شهریار اؤز اؤزلویونه چاتیر، او زامان کی اوستاد شهریار اؤزگه‌لردن قیریلاراق "اؤز قصه‌سینی" "اؤز دستانینی" دیله گتیرمک ایسته‌ییر، او زامان کی اؤز کیملییینه قاییتماق اوچون اؤزونه گووه‌نجه‌لی بیر دایاق آختاریر، او زامان کی کیملییینی قوروماق اوغروندا باشلادیغی اؤزگورلوک ساواشیندا بیرینه آرخالانماق ایسته‌ییر، آذربایجانین لاپ تمل میفیک شخصیتی ساییلان عین حالدا دونیا تورک‌لرینین کیملیک سیمگه‌سی ساییلان دده‌قورقودا آرخالانیر:

قاناد ایستر بو فضا، قوی قالا ترلانلی سهندیم
ائشیت اؤز قصه‌می، دستانیمی، دستانلی سهندیم
سنی حیدربابا او نعره‌لر ایله چاغیراندا
او سفیل داردا قالان تولکو قووان شیر باغیراندا
شیطانین شیللاغا قالخان قاطیری نوخدا قیراندا
دده‌قورقود سسین آلدیم، دئدیم آرخامدی، ایناندیم
آرخا دوردوقدا سهندیم ساوالان تک هاوالاندیم
سئله قارشی قووالاندیم

البته، اونوتمایالیم کی باشقا شعرلرینده اؤزونو تورک اوغلو هابئله آذربالاسی آدلاندیران شهریار، اینانجلی بیر شیعه هابئله سیّد اولدوغونا گؤره، یوخاریدا وورغولادیغیم اؤزگورلوک ساواشیندا اؤزونو علی‌اوغلو آدلاندیریر:

من علی اوغلویام، آزاده‌لرین مردی مرادی...

بو قونودا گئنیش بیلگی الده ائتمک اوچون باخین منیم شهریارلا بیرلیکده اؤزگه‌لشمکدن اؤزلشمه‌یه دوغرو آدلی کیتابیما