آیاق‌قابیچی، نی‌چالان و کرالین، هر بیری‌نین، اؤز وظیفه‌سی و ایش آلانی وار. بونلارین هر بیری‌نین یاخشی‌لیغی و یا ایشلَوسللییی اؤز وظیفه‌لری‌نین [ائرگون] دوزگون یئرینه یئتیریلمه‌سینه باغلی‌دیر. آریستوتئل سوروشور: بونلارین هر بیری‌نین خصوصی بیر گؤره‌وی اولسا دا، اینسانین اینسان اولاراق اؤزگو [اؤزونه مخصوص] بیر ایشله‌وی یوخدورمو؟

سیاسال بو مسئله‌نین جاوابیندادیر کی آنلام قازانیر. جورجو آگامبئن‌-ه گؤره، سیاسال اینسان توپلولوق‌لاری‌نین »ایشسیزلییینه« اویغون گلیر. سیاستین وار اولماسی بونونلا باغلی‌دیر کی، اینسانین اؤزل بیر فونکسیاسی یوخ‌دور، و اونو هر هانسی بیر ائیلم‌له معینلشدیرمک/تانیملاماق مومکون دئییل. اینسان ائله آرین پوتئنسیال‌دیر کی، هئچ بیر کیملیک و یا میسیا اونو اؤز قانادی آلتینا آلا بیلمیر.

بیر آیاق‌قابیچی‌نین ایشی آیاق‌قابی تیکمکدیر، نی‌چالانین ایشی نی چالماق، کرالین ایشی ایسه اؤلکه‌نی ایداره ائتمک. آنجاق اینسان اولاراق اینسانین ایشی سیاسال‌لا اوغراشماق‌دیر؛ [قورتولوشچو] سیاست یوروتمکدیر. سیاسال واسیطه‌سی ایله‌دیر کی، حیوان آدیندا بیر جینسدن، اینسان آدیندا بیر نؤوع باش قالدیریر. سیاسال اینسانین اینسانلیغی ایله باغلاناراق آنلام قازانیر. سیاسال اولمادان اینسانلیق گئرچکلشه بیلمزدی.

* "سیاسال" سؤزو »سیاست«دن فرقله‌نیر. سیاسال سؤزو صیفت اولسا دا، بوردا اونو (ایستانبول تورکجه‌سینده‌کی کیمی) ایسم اولاراق ایشله‌دیرم. بو، اینگیلیسجه ده پولیتیکال ایصطیلاحی‌نین قارشیلیغی‌دیر. بو ترمین فارسجادا "أمر سیاسی" کیمی چئوریلیر. (داها آرتیق ایضاح اوچون باخ: ایواز طاها، »کیملیکچی سیاست باره‌سینده پاتولو یک تزلر«.)