نویابرین ۲۵-ی تهرانین «آزادی» ایستادیونوندا تبریزین «تراکتور» فوتبول کلوبو ایله پایتختین «پرسپولیس» کومانداسی (تیم) آراسین‌دا کئچیریلن ماتچ (مسابقه) زامانی حادثه یاشانیب.

اویون‌دان اؤنجه «پرسپولیس»این اوچ طرفداری آذربایجان‌لی طرفدارلارا ویدئو-مراجعت یوللایاراق، بازار گونو ایستادیونا گئده‌جکلرینی و پان تورکلرین «خلیج عربی» (عرب کؤرفزی) شعارلارینا جواب اولاراق «آرتساخ ارمنی» شعاری سسلندیره‌جکلرینی بیان ائدیبلر. «قاراباغین دوزگون آدی بودور: «آرتساخ ارمنی»، - اونلار بیلدیریبلر.

سؤزوگئدن طرفدارلار ایران چمپیوناتینین ۱۳-جو هفته‌سینده ایستادیونا اللرینده قاراباغین ارمنیجه قوندارما آدی یازیلمیش پانکارتلا گلیبلر. بو دا او تایلی-بو تایلی آذربایجان‌دا بؤیوک ناراضی‌لیقلا قارشیلانیب.

بوندان اول ده دفعه‌لرله «تراکتور» - «پرسپولیس» گؤروشو موختلیف نگاتیو (منفی) اولایلارلا یاددا قالیب. بو دا اصلینده تصادفی دئییل. چونکی «تراکتور سازی» جنوبی آذربایجان‌دا یاشایان هم یئرلیلریمیز اوچون بیر فوتبول کلوبوندان داها بؤیوک معنا کسب ائدیر. حاضردا بو کلوب ایران‌دا یاشایان آذربایجان تورکلرینین کیملیک موباریزه‌سینین سیمووللاریندان بیرینه چئوریلیب. ۴۸ ایللیک تاریخی اولان «تراکتور سازی» کلوبو گوجونو تورک نفوذوندان آلیر. «تراکتور» دونیادا ان چوخ طرفداری اولان تورک کلوبودور.

۱۹۷۰-جی ایلده یارادیلمیش بو کلوب آدینی تبریزده فعالیت گؤستره‌ن تراکتورقاییرما زاوودوندان (کارخانه) گؤتوروب. کلوب ایلک واختلار سؤزوگئدن زاووددا چالیشان ایشچیلردن عبارت اولوب و سونرادان پئشکار (متخصص) کوماندا (تیم) کیمی فعالیتینی داوام ائتدیریب.

تهرانین «پرسپولیس» کلوبو ایسه آدینی اهمنیلر (هخامنشی لر) دؤولتینین پایتختی کیمی تاریخه دوشن، حاضردا خارابا وضعیتینده اولان پرسوپولیس شهریندن گؤتوروب.

اصلین‌ده، بو میللی-ایدئولوژی باخیمدان «تراکتور سازی»نین کاتالونییا بؤلگه‌سینین میللی دویغولارینین فنومنی حساب اولونان «بارسلونا» کلوبو ایله اوخشارلیق تشکیل ائتدیینی سؤیله‌مک اولار.

ایسپانییادا فوتبول هر زامان باسکلارین و کاتالونلارین رژیمه قارشی موباریزه طرزی اولوب:

ایسپانییا، بارسلونا

ایران، تبریز

ایران‌دا فوتبول ایستادیونونا تاماشاچی توپلاماق رکوردو «تراکتور»ا مخصوص‌دور: ایرانین یوکسک فوتبول لیگاسینین اویونلاری چرچیوه‌سینده «تراکتور»اون تبریزین سهند ایستادیونوندا شیرازین «مقاومت سپاسی» کومانداسینا قارشی کئچیردیی اویونا ایستادیونون توتوموندان داها آرتیق طرفدار گلیب و بعضی منبع‌لره گؤره، سایی ۱۱۰-۱۵۰ مین آراسی اولان بو آزارکئشلر اؤز دوغما کوماندالارینا (تیملرینه) حتی اطراف‌داکی تپه‌لرین اوزرینه چیخاراق آزارکئشلیک (طرفدارلیق) ائدیبلر.

«تراکتور» آزارکئشلری ایستادیوندا تورکچولوک، آذربایجانچیلیق مفکوره‌سینی، قاراباغ و آذربایجانین اراضی بوتؤولویو کیمی ایدئیالاری مدافعه ائتمکله یاناشی، هم ده ایران‌دا قادین حقوقلاری، اکولوژی پروبلملر و بو کیمی دیگر جدی مسئله‌لره ده توخونور.

اورمییا گؤلونون قوروماسینا (گونئیلی فعاللارا گؤره، قصداً قورودولماسینا) قارشی ۲۰۱۰-جو ایلده‌ن باشلایان آردیجیل و کوتلوی اعتراضلارین اساس آپاریجی قوه‌سی «تراکتور سازی» کلوبونون آزارکئشلری (طرفدارلاری) اولوب:

بازار گونو «آزادی» ایستادیونوندا یاشانان اولای ایران و آذربایجان رسپوبلیکالارینی مؤوقعینی دئییل، ایکی کلوب آزارکئشلری آراسیندا مؤوجود اولان رقابت و قارشی‌دورمانی عکس ائتدیریر.

لاکین ایدمانین آنتروپولوژی پرسپکتیولری حاقدا یازان دونیا شهرت‌لی بریتانییالی یازار سیمون کوپرین ده دئدیی کیمی، «فوتبول هئچ واخت ساده‌جه فوتبول اولماییب». تجروبه گؤستریر کی، ۱۹-جو عصردن بو گونه قدر فوتبول دونیا سیستمینین فورمالاشماسیندا ان واجیب روللاردان بیرینی اویناییب.
اودور کی، یاشانان حادثه لرین ایکی دؤولت و میللت آراسیندا مناقشه یاراتماسینا، طرفلرین قارشی‌دورماسینا گتیریب چیخارماسینا ایزن وئرمک اولماز.

ایران پلیسی دفعه‌لرله «تراکتور» آزارکئشلرینین الین‌دن آذربایجان رسپوبلیکاسینین اوچرنگلی بایراغینی آلاراق، فوتبولو سیاسیلشدیرممیی طلب ائدیب. عینی آرقومنتله «پرسپولیس» فاناتلاریندان دا موستقیل آذربایجان رسپوبلیکاسینا قارشی تخریبات اولان بو پانکارتی آلا و بئله‌لیکله ده عدالتلی مؤوقعیی ایله هم اؤز وطنداشلاری اولان گونئی آذربایجان‌لیلارینین، هم ده آذربایجان رسپوبلیکاسی وطنداشلارینین حؤرمتینی قازانا بیلردی.

ایران پلیسی بونو ائتمه‌مکله داخیلی چاتین درینلشمه‌سینه اؤز «تؤهفه»سینی وئریر – اؤز ایشیدیر، اؤز دؤولتیدیر، اؤزو بیلر، آنجاق آذربایجان رسپوبلیکاسینا حؤرمت ائتمک اونون بورجودور. آذربایجان رسپوبلیکاسیندا کئچیریلن ماتچلاردا بیرجه دفعه ده اولسون، ایرانین اراضی بوتؤولویونه قارشی هئچ بیر شعار سسلندیریلمه‌ییب، پانکارت آچیلماییب، ایرانا قارشی تخریباتا ایمکان وئریلمه‌ییب.

بو سبب‌دن Axar.az سایتی مسئله ایله باغلی ایران ایسلام رسپوبلیکاسینین اؤلکه‌میزده‌کی سفیرلیینه رسمی مراجعت مکتوبو یوللایاراق، اولایین یاشاندیغی ایستادیون آدمینیستراسییاسینین جزالاندیریلماسی و گله‌جک اویونلاردا داها گوجلو تدبیرلرین آلینماسینی خواهیش ائدیب.