ظولمون تکجه ایقتیصادی ماهیتی یوخ‌دور. اونون آیری-آیری بیچیم‌لری وار. چئشیدلی ظولم‌لره قارشی دیره‌نیش‌لر ده ایستر-ایسته‌مز موختلیف‌دیر. ضیددیت‌‌لر ده بئله‌دیر، اونلارین نئچه-نئچه بیچیمی وار‌دیر. ضیددیت‌‌لرین چئشیدلیلییی، اونلارا قارشی موباریزه‌لرین رنگارنگلییینه ده گتیریب چیخاریر.

لاکین کلاسیک مارکسیزم‌ـه گؤره، عدالتسیز قورولوش‌لارا قارشی دیره‌نیش‌لری، صینیف [طبقه] موباریزه‌سی چرچیوه‌سینده یئرلشدیرمک اولار. بونون معین آنلامی وار. یعنی کاپیتالیزمه قارشی صینیف موباریزه‌سی ظفر چالیشیرسا، یاشیل چئوره‌‌نین چیرکلنمه‌سی، قادین آیریمچیلیغی، ائتنیک پروبلئم‌لر، مدنی سیخینتی‌لار و نهایت ساواش‌لار آرادان قالخاجاق. یعنی بوتون توژلوسمال پروبئلم‌لری ایشچی‌لر و یاتیریمچی‌لار آنتاگونیزمی چرچریوه‌سینده حل ائتمک اولار.

ظولم و دیره‌نیش باره‌ده بو بیر داریسقال باخیش بوجاغی‌دیر. دوغرودور، توپلومو دئویندیرن [حرکته گتیرن] عامیل آنتاگونیزم‌دیر. آنجاق، پوست‌مارکسیست‌لره گؤره، توپلومداکی بوتون ظولم و دیره‌نیش چئشیدلرینی صیرف اقتصادی چرچیوه‌یه سیغیشدیرماق اولماز. اؤرنه‌یین، جینسی و یا ائتنیک آیری-سئچکیلیک صیرف کاپیتالیزمین نتیجه‌سی دئییل. باشقا سؤزله، کاپیتالیزمی آرادان قالدیرماق‌لا سؤیله‌دیییمیز آیری‌سئچکیلیک‌لر اؤز-اؤزونه آرادان قالخمیر. و یا ساواش‌لار یالنیز ثروت پایلاشیمی و ایقتیصادی منفعت‌لردن آسیلی دئییل، چوخ‌ندن‌لی بیر فئنومئن‌دیر.

اؤرنه‌یین هاوانی چیرکلندیرن بیر فابریکه قارشی کوتله‌نی سفربر ائتمک اولار. بو، کاپیتالیزمه قارشی بیر موجادیله‌دیر. چونکو فابریک اونون آیرینتی‌لاریندان‌دیر. لاکین چوخ گومان کی، ایشچی‌لر بو موجادیله‌یه قاتیلمایاجاق‌لار. ترسینه، اونلار ایش یئرلرینی قوروماق آماجیلا صاحیب‌‌کارلارلا بیر جبهه‌ده دایاناجاقلار.

سووئت‌لر بیرلییی‌نین داغیلماسی ایله تاریخی دییشیمین یئگانه عامیلی ساییلان ایشچی قوه‌سی باشلیجا رولونو ایتیردی. سونوجدا بئله بیر آغیر و نفس‌کَسَن سوال اورتایا چیخدی: اونون یئرینه هانسی یئگانه عامیلی قویماق اولار؟

بو سوال آرتیق یئرسیزدیر. چونکو تاریخ و توپلوم عرصه‌سینده یئگانه عامیل آراماق یانلیش‌دیر. توپلومدا باش وئرن موباریزه‌ چئشیدلرینی اؤزونده أریده بیلن بیرجه حرکت و یا بیرجه ایجتیماعی ائتکن [عامیل] یوخ‌دور. بیرجه ائتکنین یئرینه بیرچوخ ائتکن‌لری آراماق گره‌کیر: چئوره‌چی‌لر، فئمینسیت‌لر (قادین حاق‌لاری ساحه‌سینده موباریزلر)، میللی و ائتنیک حاق‌لار اوغروندا دیره‌نیش‌لر. بونلار ائش‌ده‌یر [هم‌أرز] عامیل‌لر ساییلیر. چوخ‌ائتکن‌لی موباریزه‌نین آدی ”کیملیکچی سیاست‌“دیر.

ایندی باشلیجا سوال بو ائش‌ده‌یر عامیل‌لرین بیرلییی ایله باغلی‌دیر. آیری-آیری آماج اوغروندا موباریزه آپاران ائتکن‌لری نئجه بیرلشدیرمک اولار؟

(“کیملیکچی سیاست باره‌ده پاتولوژیک تئزلر“ کیتابی‌نین یئنی رئداکته‌سیندن سئچمه‌لر”)