بخارا حاکیمینین یای ساراییندان چیخیب، «چهار منار» آدلی بیر مکانا گئدیریک. بوروق- بوروق دربندلردن پیادا یولا دوشوب، نهایت بیر مئیدانچایا یئتیشیریک. دربندلرده گئدرکن تاشکند شهرینده گؤزومه گلن بیر مسئله‌ بو دار دربندلرده بئله دیقتیمی چکیر.

بو اؤلکه‌نین کوچه‌لرینده‌کی گاز لوله‌کشلییی چوخ بدسلیقه‌ و یؤندمسیز‌دیر. ائله بیل بونلاری ناشی بیر صنعتکار ایشله‌میش. بورادا توریستی مکانلارین گؤزللیینه اوْ قدر دیقت وئریلدییینه رغماً گؤز قاباغیندا اولان گاز لوله‌کش‌لیکلری افتضاح و غیرپروفسیونالدیر. منه ائله گلیرکی بو چیرکین لوله‌کشلیکلر تاریخین اوره‌یه یاتیم سوواق دیوارلارینا آغیز بوزورلر. بئله بیر چیرکین وضعیّتده مدرنیزمی سنّته دویونله‌مک ذؤوقوما توخونور.

ایکی جوت ائکیز میناره گؤیه دوغرو یؤنه‌لیب و بیر- بیرینین کناریندا دایانیبلار. قاباقداکی بیر جوت میناره‌نین باشینداکی کیچیک فیروزه گومبذلرین طرحی آرخاداکی جوت میناره ایله فرقلی‌دیر. بلدچی بو میناره‌لرین حئکایه‌سینی بئله سؤیله‌ییر: «بو دؤرد میناره مدرسه دروازاسی ایدی. 1807-جی ایلده نیازگول آدلی بیر تاجیر بو میناره‌لری تیکدیرمیش. نیازگول هندوستانا تیجارت مقصدیله گئدیر و اورادا بؤیوک میناره‌لر گؤرور. بو تاجیرین دؤرد یئتیشکن قیزی وارمیش، لاکین قیزلارین ائلچیلری یوخ. او اوزدن هر قیزین آدینا بیر میناره تیکدیریر. اوندان سونرا قیزلارا ائلچی گلیر و...»

بو شیرین حئکایه چوخ خوشوما گلیر. اؤز- اؤزومه دئییرم: «اؤلمه‌دیک قالدیق، نهایت بو اؤلکه‌ده بیر غیرمقدس ناغیل دا ائشیتدیک!»

میناره‌لرین باشیندا لئیلکلر یوُوا قوروبلار. بیرینین اوستونده بیر قوش اوتوروب. بوتون دیققتیمله‌ باخسام دا آنجاق هانسی قوش اولدوغونو سئچه بیلمیرم. بلکه ده لئیلکدیر و اسلام کریموْو دئدییی کیمی بیر آیاغی اوسته دایانیبدیر. لئیلک یوخسا آیری بیر قوش اولورسا اولسون، آنجاق ندنسه نیمایوشیجین هئیکل قوش (مرغ مجسمه) آدلی شعری ذهنیمدن کئچیر:

مرغی نشسته بر سرِ بامِ سرای ما

مرغی دگر نهفته به شاخِ درخت کاج

و... .

بو اؤلکه‌ده امنیت و تهلوکه‌سیزلیک حیسی حقیقتاً هامیمیزا تأثیر بوراخیر. قالابالیق خیاوان یا بازارلاردا چانتاوی برک برک سیخیب ساخلاییب، امنیت‌سیزلیک حیسی یاشامیرسان. ائله‌سه، اوندا یاشاسین بیرآیاقلی دایانمیش حاجی‌لئیلک!

یاشاسین باریش و امنیت!

«اؤزبکیستان سفرنامه‌سی» کتابیندان, چهارمنار