اوشاقلیق چاغلاریندا، آتام کئچمیش خاطره لریندن دانیشاندا، جیلولوق کلمه سین چوخ ایشله دردی، فرقه‌ حکومتیندن دئیردی، آذربایجانین‌ باشینا گلدیکلریندن سوز آچاردی. غلام یحیی، دئمقیرات، پیشه وری، بی ریا، فدایی، کلمه لری آتامین لهجه و سسی ایله هله ده قولاغیمدا سسله نیر.

جیلولوق کلمه‌سی‌نین معناسین بیلمه‌سیدیم‌ده، اوندان یارانان قا‌ن قوخوسون اییله‌یردیم سانکی. ارمنی لرین آذربایجان تورکلرینه نه ائتدیکلری، عوثمانیلارین نئجه یاردیما چاغیریلماقلاری، خوی شهرینده دؤیوشون نئجه کئچیریلمه سی، اورمیه سالماسدا نئچه نئچه قتل عام صحنه لری، خویلولارین مردانه دوروشوب ساواشلاری،‌ خاطیره خاطیره ذهنیمه کؤک سالیب اوزاماندان.‌ ارمنیلرین، ارمنی لهجه سیله‌ توروکو دانیشماقلارین، حتی تورکلری قورشونا باغلاماقلارین، یامسیلاردی آتام. حتی دئیه ردی عثمانلی عسگری‌نین توپ گول‌له سی، ارمنی توپونون لوله سی‌نین آغزینا سوخولموشدو دومبلن دوز. آتام بو خاطره لرین بیر آزین اؤزو یاشامیشدی، بیرازین آتاسیندان نقل ائدردی.

ایندی ایسه جیلولوق، بیلیرم ندی. حتی آتامین نقل ائتدیگی خاطیره لر اولماسایدی دا، اوخویوب بیله جکدیم جیلولوق نه ایمیش، و باش تاپاجاقدیم، روسلارلا انگلیسلرین اوزامانکی قانجیق سیاستلری نه ایمیش، باتی آذربایجانیمیزدا.

آیدین آشکار ایستیردیلر،بوردا بیر ارمنستان مملکتی یاراتسینلار، او واسیطه ایله ده تورکیه و آذربایجان آراسیندا اولان تاریخی و سرزمینی رابطه نی قیرسینلار. انگلیسلرله روسلارا، ارمنیلر یالنیز ارمنی و مسیحی اولدوقلاری اوچون‌ یوخ، بلکه کریستینلیکدن چوخ چوخ مهم، تورکیه و آذربایجان تورکلری آراسیندا بیگانه لیک یاراتماق و اولاری بیربیریندن قیرماقدی. ائله ایندی ده همان سیاست اوزه رینده چابالیرلار.‌ (باتی لیلار صفوی دوورونده ده همان سیاستی قوشوب، چالدیران ساواشین دوزه نلدیلر.)

چوخ شوکور، اوزامان جیلولولارین حامیلری‌نین مقابیلینده، عوثمانلی دولتی، آذربایجانیلار طرفیندن یاردیما چاغریلدی، تانریا مین شوکور, عثمانلی دوولتی ده آذربایجاندا‌ تورکلری یالنیز بوراخمادی، آرازین اوتاییندا روس جیبهه سینده دویوشن عسگرلردن، بیر قیسمتین آذربایجانا‌ کمک گوندردی و قورتاردی تورکلری، ائرمنیلر جنایتین دن.

البته سونرالار استالین، آرازین اوتاییندا، ائرمنی لری، اوردان بوردان ییغیب گتیریب، قوزئی آذربایجان توپراقلاریندا یئرلشدیریب، بیر ائرمنی دولتی یاراتدی، تاریخی توپراقلاریمیزدا.

بو گونوموزده،باتی‌نین پینهان و آشکار گوجلری طرفیندن، باتی آذربایجان دا همان پیلانی یئرینده اوتورتماق ایسته ییرلر. ائرمنیلرله باشارا بیلمدیکلری پیلانی، یازیق کوردلر ایله ایستیرلر ایجرالاندیرسینلار. بیر کورد حکومتی تورکیه و آذربایجان آراسیندا، ایکی تورک توپراقلارین بیر بیریندن آییرماق اوچون.‌.

غربی گوجلر، بو پیلانین ایجراسی اوچون بوتون مستقیم و غیر مستقیم عامیل لرین توپلاییبلار، هئچ ده شوخلوقلاری یوخدو. بو پیلانین ایجراسی اولارین داها سونراکی سیاستلری اوچون، چوخ اونملی ساییلیر، اولارا کوردلر و اولارین قارا گونه دوشمکلری اصلا مهم دئییل. اونلار بو پیلاندان واز کئچه بیلمزلر.

اما باتی اوچون زمان چوخ آزدی. تورکیه مملکتی گونو گونده ن گوج لنیر. آذربایجاندا میللی روح گلیشیب و داها دا گوجلنمک حالیندا دیر، آرازین قوزئینده آذربایجان مملکتی هر لحظه اینکیشاف تاپیر. بیر طرفدن ده، ارمنستان آدلی بیر ائیرتی و قوندارما مملکت، گونو گوندن ضعیف لیر، و گئدیرکی باتی گوجلرینه بیر آغیر پروبلمه چئوریلسین.‌

باتی گوجلری، مجبوردولار منطقه ده قونداریب یئرلشدیردیکلری عامیل لرین، تله سدیرسینلر، ....تئز اولون واخت یوخدو، تورکلر گوجلنیر دئسینلر.

دقیقا بو نقطه ده دی کی جناب شهریاری، استاندار استان آذربایجان غربی، ال آیاغین ایتیریب، تله سیب، بارا وئریب، بیلر بیلمز تورکلره نیسبت، ایچینده اولان نیفرت و‌کینه سین، یئمک بوخچاسین‌ین اوستونه قایتاریب. جیلولوق سوی قیریمین دانیب، چوخ یاخین تاریخین دانیلماز و آشکار جنایتین، ارمنی داشناکلارین یاراتدیغی سوی قیریم جنایتین.

فارس محور حکومت طرفیندن، غربی آذربایجانا، یئرلشدیریلن کورد استاندار، آذربایجان تورکونون، ایپین ائشمکده،... جناب مهرعلیزاده، اصفهان استانینین تورک‌دیللی استانداری دا، جان و دیلدن فارس خالقینا خیدمت ائتمکده.

استاندار ایله استاندارین نه قدرده فرقی واریمیش دئمک..