کولت.آذ گونئی‌لی شاعر و یازار ووقار نعمتین یازیسی‌نی تقدیم ائدیر:

اینسان، دوغال(طبیعی) یاپی‌سینین اؤته‌سینده توپلومسال(اجتماعی) بیر وارلیق‌دیر. بیر توپلومسال ایلیشکی‌نین سونوجو اولاراق وارلیق قازانیر و یاشامینی سوردورور. یاشادیغی توپلومون ایچینده بیر یئر و آنلام قازانیر. "توپلوم" آدینی وئردیییمیز سوسیال ایلیشکی‌لر سیستئمی ده اینسانلارین تک-تک ائیلم‌لریندن و یاشانتی‌لاریندان اولوشان بوتونلوکدور.

توپلوم ایچینده یاشایان اینسانلارین چیخارلاری و بکله‌نتی‌لری فرقلی‌دیر. بو دورومدا بعضن بیر-بیرلری ایله آنلاشمازلیق‌لارا دوشه‌بیلیرلر. بو آنلاشمازلیق‌لار، بیرئی(فرد)‌لرین و توپلومون عینی دوزَن ایچه‌ریسینده بوتونلشمه‌لرینی اؤنله‌یه‌بیلیر. توپلومسال یاشانتی‌نین دوزَنلی بیر بیچیمده سورمه‌سی اینسانلارین اؤزگورلوک، حاق و سوروملولوق چرچیوه‌سینده حرکت ائتمه‌لرینه باغلی‌دیر. اؤزگورلوک، حاق و سوروملولوق توپلومسال یاشامدا بیر دنگه(تعادل) ساغلاماغی گره‌کدیریر.

اؤزگور اولمایان اینسان اوچون حاققین بیر آنلامی یوخدور. حاق؛ ایسته‌مک، اؤزگورلوک ایسه؛ یاپابیلمک‌دیر. اؤرنه‌یین "سیاحت ائتمه" بیر حاقدیر؛ آنجاق بو حاق، اؤزگورلویون اولدوغو بیر توپلومسال دوزَن ایچینده گرچکلشدیریله‌بیلیر. "عدالت آراما" بیر اؤزگورلوکدور؛ آنجاق "دعوا حاققی" ایله گئرچک‌لشه‌بیلیر. حاق اؤزگورلوکلرین تملی و قونوسو، اؤزگورلوک ایسه حاققین گئرچکلشمه آراجی‌دیر.

اؤزگورلوک دووارلارلا، حاصارلارلا، زینجیرلرله، تئرور و اعدام‌لارلا کونترول آلتینا آلینابیله‌جک بیر حال دئییلدیر. اؤزگورلوک، کیمسه‌نین بیزی کونترول آلتینا آلابیلمه‌یه‌جه‌یی بیر دونیادا، یانی ذئهن‌ده گئرچکله‌شیر… یئنه اورادا اولقونلاشیر و ایچیمیزدن ائشیک دونیایا سیچراییر. دوامیندا دا بو دوروم عینی مرکزده یانی، ذئهنیمیزده ده‌ییشیر و روحوموزدان بسله‌نه‌رک دؤنوشور. بونون سونوجوندا داها بلیرگین بیر فورما قوووشور. آرتیق توم یاشامیمیز بویو اؤزگورلوک آلقی‌میز سئچیم‌لریمیزده اؤزونو گؤسته‌ریر و بو سئچیم‌لریمیزله برابر یاواش-یاواش اولوشان یول خریطه‌سی ده بؤیوک اؤلچوده قده‌ر دئدیییمیز پلانیمیزین اؤزونو و اؤزولونو مئیدانا گتیریر.

اصلینده طبیعت‌ده، اؤز اؤزگورلویونون بیر باشقاسی‌نین اللرینده اولدوغونو سانان تک وارلیق اینساندیر. بو یانیلسامانین سببی؛ هر دوغان یئنی اینسانین عاییله حیاتی و سونراسینداکی سوسیال ایلیشکی‌لریندن اؤزونه ایسته‌م خاریجینده عکس اولونان دوگماتیک بیلگی کودلاری و بونلارلا اولوشدورولان قالیب‌لردیر. هر بیرئی(فرد) اوست کیم‌لییینده توپلومون بیر پارچاسی اولماسی‌نین یانی سیرا، تمل یاپی داشینی اولوشدوران آلت کیم‌لییینده، «ائورَن‌سل بوتونون» بیر پارچاسی‌دیر کی، بیرئی‌سل کیملیک اینشاسی اوچون کئچرلی اولان هارچ(کولتور) دا بودور.

قالیب‌لارلا سینیرلاندیریلان، قیسیرلاشدیریلان و دئفورما ائدیلن «یارادیجی گوجوموزو» هر یئنی دوغانلا برابر ضعیف‌لتمه و یوخ ائتمه تلاشی ایچینده اولان توپلوم، اوست‌عاغیل آراجی‌لیغی‌یلا بیرئی‌سل‌لییین ده اؤنونه کئچمه‌نین ان راحات یولونو تاپمیش اولور.
چونکو «بیرئی‌سل» گوجونو فرق ائدن هئچ بیر اینسان، توپلومون «نورماللاشدیریلمیش»، معصوم ایدئعاللار فورماتینداکی تئکنیک‌لری‌یله کؤله‌لشدیرمه‌یی ایسته‌مه‌یه‌جک و قبول ائتمه‌یه‌جکدیر.

سونوج اولاراق گئرچک تانیمی‌یلا اؤزگورلوک دوشونجه‌دن، دوشونجه بیرئی اولاراق اونورلو بیر دوروش سرگی‌له‌یه‌بیلمکدن، اونورلو بیر دوروش ایچ‌سل گوجونو فرق ائده‌رک دیشاری‌دان ایچه‌رییه دئییل، ایچه‌ریدن دیشاری باخماقدان کئچر.

سونو "نئلسون ماندئللا"نین بیر سؤزویله بیتیره‌لیم؛ «اؤزگورلوک اوچون گؤی ازونو ساتین آلمانیزا گره‌ک یوخدور، روحونوزو ساتمایین، یئتئر.»