ایران_فارس، فاشیزمی و شوونیزمینین ۲۱ آزر ۱۳۲۵_۱۹۴۶ دا گونئی آزربایجان دا میلی حاکمیتین سیاسی و دؤولت آیاغینی هدف آلیب قولدورجاسینا محو ائتدیکدن سونرا، ۲۶ آزر ۱۳۲۵_۱۹۴۶ تاریخینده میلی حاکمیت و میلی کیملییین مدنیت و کیملیک آیاغینی هدف آلاراق تورکجه کیتابلاری اورقانیزه، رسمی و دؤولتی بیر سویه ده آزربایجانین هر یئرینده گئنیش بیر بیچیمده، تونقاللار قوراراق زورنا قووال لا یاندیریلماسی، فارس-ایران ذهنیتی‌نین ماهیتینی آچیقجا گؤسترگه سی ایدی.

ایشغالچی لار، اصلینده یالنیز میلی حکومت له دئییل بلکه آزربایجان و آزربایجانی یارادان دیل، مدنیت، وارلیق و کیملیک له دوشمن اولدوقلارینی گؤستردیلر. ایشغالچی گوج و ذهنیت آزربایجانین تورکلویو، تاریخی، مدنیتی، دیلی و بیر سؤزله میلی کیملییی ایله دوشمن ایدی.

بونون اوچون ۲۶ آزر ده یالنیز تورکجه کیتابلار دئییل، آزربایجانی، آزربایجان ائدن میلی وارلیغیمیز و میلی کیملیییمیز ده سیموولیک اولاراق اودا چکیلدی.

آریایی راسیزم هر زامان تاریخده جنایت، وحشی لیک، اویغارلیقلارین محوی، استبداد، استعمار، یاساقلار، آنتی مدنیت ایشلری ایله حیات سوروب اؤزونو آیاق اوسته ساخلایا بیلمه یه موفق اولوبدور. ۲۱ آزر ۱۳۲۵ بونو حربی و سیاسی اولاراق اورتایا قویان آریا فاشیزمی بو ایرنج و چیرکین اوزونون مدنیت اوزره دوشمنلییینی بروزه وئره رک، تورک دیل و مدنیتینین محوینه آند ایچدییینی ثبوت ائتمیشدیر.

آرادا کئچن ۷۲ ایل سوره سینده فارس شونیزم ذهنیتی اصلاح اولماییب تام ترسینه داها غدارلاشیب و داها غلیظ لشیب دیر.

بونون اوچونده فارس شوونیزم_فاشیزمی‌نین آزربایجانا و تورک میلتینه درد، عذاب،استبداد، استعمار و تورک_آزربایجان کیملییی ایله دوشمنلیک دن باشقا وئره جک هئچ نه یی یوخدور.

کیتابلاری ۲۶ آزر ۱۳۲۵_۱۹۴۶ ده یاندیریلان میلتین اؤولادلاری، او گوندن بو گونه دوام ائدن بو وحشت و استعمار تاریخی‌نین آردیجیللیغینی قیرمالی و اؤز کیملیک و وارلیغی اساسیندا اؤز دوغما اویغارلیغینی قورمالی دیرلار. بو میلی اویغارلیق قورولماسا، تورک میلتی و آزربایجان وطنی ۲۱ و ۲۶ آزر ۱۳۲۵-۱۹۴۶ نکبت و بلاسیندان قورتولا بیلمیه جکدیر و هر زامان وارلیغی یاندیریلیب و کیملییی و طالعی اودا چکیله جکدیر.