کولت.آذ گونئی‌لی شاعر و یازار ووقار نعمت-ین یازیسینی تقدیم ائدیر:

فارس شووونیزمی‌نین تکجه سناریست و تئوریسین‌لری و سیاست آداملاری دئییل، صنعت اورونلرینه، صنعت اثرلرینه و صنعت‌کارلارینا باخیلدیغیندا بئله، فارس شووونیزمی‌نین کولتور صنعت آلقی‌سینین، اینسان و اینسان حاقلاری آنلاییشی‌نین نه دورومدا اولدوغونو یاخشیجا باشا دوشمک اولار.

درس کیتابلارینداکی اویدورما درس‌لردن، تحریف‌لردن و ایرقچی‌لیق‌دان توت دا قزئته و تئلویزیادا کی ائتنیک تحقیرلر، اهانت‌لر و سؤیوش-یامانلار، آسیمیلاسیون، آلقی اوپئراسیونو، سؤمورو و ...لر و نه‌لر!...

فارس شووونیزمی، آذربایجانین ماددی-معنوی قایناغینی و وارلیغینی قوروتماقلا یاناشی، آزربایجان اینسا‌نینی، اؤزه‌للیکله یازارلاری، دوشونورلری و آیدین‌لاری دوشمن اولاراق گؤرور.

گئنل‌لیکله، فارس شووونیزمی آنتی‌کولتور بیر اولقودور. هر هاردا بیر کولتور و کولتور اورونو گؤرورسه (اؤزه‌للیکله اگر بو کولتور اورونو تورک میللتینه و یا فارس اولمایان بیر میللته عایید ایسه،) گیریب اورانی کیرلندیرمک و خارابایا چئویرمک ایستر.

تورک آتا-بابا قبیرلرینی، باستانی تپه‌لرینی و تایسیز عابیده‌لرینی ائرمنی نوسخه‌لری و فارس نقشه‌لری‌یله، آسیمیله اولموش بیلینج‌سیز مانقورد الی ایله قازیب چیخاریب، آوروپا بازارلاریندا حرراجا قویار فارس شووونیزمی.

فارس شووونیزمی، میللی کولتور اوره‌تیمی و یاییلیمی‌ندان، ائله‌جه ده میللی-سیاسی شعورون گلیشمه‌سیندن راحاتسیز اولوب و قورخار. چونکو میللی کولتور گلیشیمی و یاییلیمی توپلوما مورال و فرح باغیشلار. حالبو کی شووونیزم، شن‌لییین، بیلینجین، فرحین، چئشیدلی‌لییین و کولتوره‌ل آزادلیغین دوشمانی‌دیر.

فارس شووونیزمی، کولتورو؛ اینسانچی خاصیت، دئموکراتیک و اؤزگورچو ماهیتی‌نه گؤره، هم ده میللی سوسیال دایاغینا و مردمی آیاغینا گؤره هئچ واخت سئومز و هر زامان آزربایجاندا، اؤز قاپالی و حزبی ذئهنیت‌لرینه باغلی ده‌یرسیز، دورغون، باغیملی، مداح و دستمالچی بیر کولتور کاریکاتورو جیزماق ایستر.

بو بایاغی شووونیزم دوشونجه‌سیزلییی‌ ایله موباریزه ائتمک، معاریف‌لنمه، آردیجیل و سیستئماتیک دوشونجه اوره‌تیمی، کولتوره‌ل و ادبی چالیشما و بیلینج‌لنمه ایله اولاسی‌لیق قازانیر. میللی توپلومو و توپلوم بیرئی‌لرینی اؤز اولاناقلاریندان، وارلیق، و کیملیک‌لریندن خبردار ائدیب بیلگی‌لندیرمک لازیمدیر.

چیچکلنمه، ایره‌لیله‌ییش، بیلینج‌لنمه، دوشونجه، فیکیر و آیدینلیق سیلاحی ایله میللی بیر عزم‌کارلیق ایچینده بو قارانلیق‌چی‌لارین اوزه‌رینه گئتمک گره‌کدیر.