کولت‌.آذ گونئی‌لی یازیچی ایشیق سؤنمز-ین یازیسینی تقدیم ائدیر:

کلمه نین اؤزوندن ده بللی اولدوغو کیمی، یاشلی کیشی-یه آغ ساقال دئییلر. اورتا یاشلی (میانسال) کیشی-یه ده قارا ساقال دئییلر. آغ ساقال ایفاده سی اجتماعی باخیمدان و اجتماعی نظردن فقط یاشلی کیشی دئییل، توپلوم و اجتماع ایچریسینده سؤزو کئچن و سؤز دئمک حاقینا مالیک اولان و خالق آراسیندا نفوذ قازانمیش بیر کیشی ساییلار. آغ ساقال بیر کیشی نین توپلوم و اجتماع آراسیندا نفوذ قازانماسی بیر گونده اورتایا چیخمیش دئییل، اونون اوزون بیر سوره و پروسه ایچریسینده توپلوم و اجتماعدا دوزگونلوک، مودروکلوک و تجربه قازانماسی ایله اورتایا چیخمیش بیر شخصیت آنلاییشی ساییلار. بئله لیکله، آغ ساقال آنلاییشی آذربایجان تورکلوگونده ایکی آنلام و معنا داشییار:
۱) یاشلی کیشی
۲) سؤزو توپلوم و اجتماع ایچره کئچمیش، تجربه قازانمیش، مودروک بیر کیشی!
زامان دگیشدیگی کیمی، دیل و دیلده ایشلنمیش ایفاده لرده زامان آخاریندا دییشیمه و دییشمیه اوغرایاراق یئنی و تازا آنلام و معنالار قازانار. بعضا ده هر هانکی بیر کلمه اؤز یئرینی باشقا بیر کلمه ایله دییشمک زوروندا قالار. بو اساسدا شخص کلمه سیندن "شخصیت" کیمی کلمه یارانار. بوگون شخصیت کلمه سی "آغ ساقال" کلمه سی نین یئرینده اوتورموش بیر کلمه ساییلار. دئمک، بوگونکو آنلاییش ایله مسئله یه یاناشارساق، "آغ ساقال" کلمه سی تاریخه قاریشمیش سنتی بیر کلمه ساییلارکن اونون یئرینه "شخصیت" کلمه سی بیر خنثی کلمه اولاراق ایستر آغا و ایسترسه ده خانیم اوچون قبوللوق قازانار. بوگون اجتماعی نظردن "آغ ساقال" کلمه سینی بیر سنتی کلمه دئیه قبول ائتمک داها دا دوزگون ساییلار. قارا ساقال کلمه سی ایسه اجتماعی ماهیت داشیماز. قارا ساقال کلمه سی فقط اورتا یاشلی کیشی اوچون ایشلنمیش بیر کلمه ساییلار.