دونن ایستانبول اونیورسیتتین‌ده آذربایجان‌لی طلبه‌لرین تشکیل ائتدیکلری ماراقلی تدبیر اولدو. همرای‌لیک گونونه حصر اولونموش تدبیرین قوناقلارین‌دان بیری اوزون ایللردیر آذربایجان جمهوریتی و اونون قوروجوسو محمد امین رسولزاده حاقین‌دا تدقیقات آپاران، کیتابلار یازان صباح الدین شیمشیر ایدی.

شیمشیر چیخیشیندا رسولزادنین عثمانلی مطبوعاتینا وئردیی موصاحیبه‌سینده قاراباغلا باغلی مسئله‌یه توخونماسیندان بحث ائتدی. بیلیریک کی، اس اس ار ای-نین داغیلماسیندا اولدوغو کیمی، ارمنیلر چار روسییاسینین سوقوطو دؤنه‌مینده ده قاراباغا ادعا ائدیبلر، بو ادعالارینی حیاتا کئچیرمک اوچون او زامان دا قتل عاما ال آتیبلار. تورک ژورنالیست ده رسولزاده‌دن بو مسئله نی سوروشوب.

ژورنالیست رسولزاده‌یه بو مؤوضوعدا سوال عونوانلاییب: «ارمنیلر قاراباغا ادعا ائدیرلر، بونونلا باغلی نه دئیه بیلرسینیز؟»

رسولزادنین جوابی بو سپکیده اولوب: «اگر بو گون قاراباغین کیمه مخصوص اولماسینی بیلمک ایستییرسینیزسه، سون ۲۰-۳۰ ایلده اورادا کیملرین سایینین چوخ اولدوغونا دئییل، کیملرین اؤلوسونون چوخ اولدوغونا باخماق لازیمدیر».

یعنی قاراباغدا کیملرین مزارینین چوخ اولماسینا...

نئجه ده موکمل جوابدیر. بو جواب او دئمکدیر کی، بو گون اورادا ارمنیلر چوخلوق تشکیل ائدیرلرسه، اما مزارلاری تورک مزارلاریندان آزدیرسا، دئمک کی، اورایا ارمنی کؤچو اولوب و یئرلی اهالی قتله یئتیریلیب.

آردینجا رسولزاده دئییب کی، اؤلولری سایماق قانع ائتمیرسه، اوراداکی عابده‌لری سایاق...

بو جوابی ایله ده رسولزاده بیر تورپاغین کیمه مخصوص اولماسیندا مؤوجود مزارلارین، تاریخی عابده‌لرین اؤنمینی قید ائدیب.

باشا دوشمک اولور کی، نیه گؤره ارمنیلر آذربایجان تورپاقلارینی ایشغال ائتدیکدن سونرا اوراداکی مزارلاری، مسجیدلری، سارایلاری، تاریخی عابده‌لری محو ائدیبلر. تکجه ایروان‌داکی سردار سارایینین بوگون تیفلیس آرخیوین‌ده ساخلانیلان فوتوشکیللری بو تورپاقلارین کیمه مخصوص اولماسی ایله باغلی موهوم ثبوتدور، اگر او سارای داغیدیلماسایدی، ایندی دونیانین تاریخی میراثلاری سیراسینا داخیل اولاجاق و دونیا تدقیقات‌چیلاری آراشدیرمالار آپاراجاقدی.

اونا گؤره ده ارمنیلر ایروان خانلیغینین روسییا طرفیندن ایشغالیندان سونرا بو و یا دیگر شکیلده اورادا تورک ایزلرینی سیلمه‌یه چالیشدیلار. بو گون تاریخه شاهیدلیک ائد‌ن گؤی مسجیدین ده تاریخینین ساختالاشدیریلماسی، فارسلاشدیریلماسی پروسسی بو سیاستین ترکیب حیصه‌سی‌دیر.

ائلجه ده قاراباغین ایشغالیندان سونرا اوزییر بیین هیکلینه آتیلان گولللر، موسلمان مزارلارینین داغیدیلماسی ارمنیلرین یئنه ده تاریخه شاهیدلیک ائد‌جک اؤلولردن و مزارلاردان خلاص اولماق ایسته‌مه‌لرینی گؤستریر. بو، مومکوندورمو؟

بونون مومکون اولماماسی اوچون بیز گرک قاراباغ اوغروندا شهید اولان هم دوننکی اؤلولریمیزی، هم ده بوگونکو اؤلولریمیزی حؤرمتله یاد ائدک، اونلارین گئریده قالان واریثلرینین حقوقلارینی ان یوکسک سوییه‌ده قورویاق.

چونکی شهید مزارلاری، شهید عائله‌لری هم ده قاراباغین کیمه مخصوص اولدوغونون جانلی ثبوتلاریدیر...