سورقو: ایران اوچون فدرال، یوخسا کونفدرال بیر سیستیم اوزره نه دئمک ایستردینیز؟

کولت.آذ ایشیق سؤنمز-ین یازیسینی تقدیم ائدیر:

جواب: فدرال و کونفدرال ایکی بیربییرلریندن فرقلی و مختلیف سیستیم ساییلار. فدرال بیر دؤلت ایالتلره بؤلونر، ایالت و ولایتلره دیل و مدنیت آزادلیغی وئریلمه سینه باخمایاراق بو ایالتلرده و ولایتلرده کئچمیشدن سوره گلن ویا مصلحتی اولاراق هر هانکی بیر دیلین مونوپول (تک حاکیم دیل) قالماسی قورونار و زامان آخاریندا ایالت و ولایتلرده کی انسانلار اؤز دولانیشلاری و راحاتلیقلاری (ایش شانسی، ....) اوچون حاکیم و اورتاق دیله تسلیم اولار. دئمک، باشقا دیل و مدنیتلر محلده اؤز اوتوریته لرینی ساخلاماقلارینا باخمایاراق زامان آخاریندا سیاسی نفوذ باخیمیندان محلده کی دیل و مدنیتلر تجریده اوغرایار.
کونفدرال ایسه مستقیل دؤلتلرین بیرلشمه سی ساییلار. بو اساسدا هر بیر دیل، دانیشیلان توپلوم ایچینده و بو توپلوم اولوشدوردوغو دؤلتین رسمی دیلی ساییلار. بو دؤلت بوتون ایشلرینده مستقیل ساییلار. کونفدرال دؤلتین عضولری هرزامان کونفدرال دؤلت بیچیمی و فورماسی اولوشدورموش دؤلتلری ترکیبیندن چیخماق حاقینا مالیک اولار. دئمک، اداره چیلیک باخیمیندان مرکز آنلاییشی دئیه بیر آنلاییش اولماز. یالنیز کونفدرال دؤلتلری اولوشدوران دؤلتلر سیاست ایجابی اولاراق بو کونفدرال یاپی و قورولوش یارادار. بو قروم و قورولوش بو دؤلتلرین منفعتیندن یولا چیخاراق بو دؤلتلرین هامیسی نین چیخارلاری و وطنداشلاری نین خوش یاشاییشلاری اوچون بیر کونفدرال سیستیمی ائشیگه دوغرو تمثیل ائدر. دئمک، کونفئدراسیون بو دؤلتلری و اونلارین قوروملارینی بیر آرایا گتیران بیر چاتی اؤرگوتو (بیر چتر آلتینا آلان تشکیلات) ساییلار.