(2-جی بؤلوم)

کولت آذ ووقار نعمت-ین یازیسینی تقدیم ائدیر:

تورکچولوک، قاراباغ موناقیشه‌سی، وطن‌پرورلیک و باشقا میللی مسئله‌لر حاققیندا هر هانسی بیر صؤحبت ائتمک اولمور. چون کی اونلار اؤزلرینه آرتیق یاد و یابانجی‌دیرلار. بونون چوخ راحت، چوخ سیناقدان چیخاریلمیش موکممل فورمالاری وار. دونیایا گلن هر بیر اوشاق عائله‌‌دن سونرا توپلوم‌دا بؤیویور، تربیه‌ آلیر. اگر هر هانسی بیر گنجیمیزین بئینینی، دوشونجه‌سینی، شعورونو یویا بیلیب‌لرسه، دئمه‌لی، آرتیق بیزیم تربیه‌ شبکه‌میزده بوشلوقلار حددن آرتیق‌دیر. اگر بیز اؤز گنج‌لریمیزی معاریف‌لندیریب، میللی اینسانا چئویره بیلمه‌میشیک‌سه، تربیه سیستئمیمیز ایدئولوژی باخیمدان، معنوی باخیمدان سون درجه‌‌ برباد دورومدادیر. بونو بیر دفعه‌لیک اعتراف ائتمه‌لیییک کی، بیزیم الیمیزدن آلینان گنج‌لریمیز و گنج‌لیییمیز داها چوخ بیزیم تربیه‌ سیستئمیمیزین بوشلوغوندان قیدالانیر. اصیل تربیه ایسه یاشام طرزیندن گؤتورولور، شعاردان ونصیحت‌دن دئییل. گنج‌لریمیزی معاریفلندیرمک اوچون اؤزوموز معاریف‌لنمه‌لی و اؤزوموزله دوغرو دوروست اولمالی‌ییق. میللی-معنوی دَيَر آنلاییشینی گنج‌لره اؤیره‌تمه‌یین چئشیدلی اوصوللاری وار: اؤرنک اولاراق قارداش اؤلکه تورکییه‌یه باخماغیمیز یئترلی‌دیر. تورکییه آوروپایا اینتئقراسییا ائدیب. لاکین بونونلا یاناشی، اونلار اوچون اؤنملی اولان ایلک نؤوبه‌ده وطن‌پرورلیک و میللی-معنوی دَيَرلریدیر. اونلار وطن‌پرورلییی تکجه موحاریبه‌‌ ائتمکده گؤرمورلر. اونلار گنج‌لرده بایراغا، وطنه، میللی قهرمانلارا، میللته سئوگینی کیچیک یاشلاریندان آشی‌لاییرلار. سؤزده دئییل، اؤزلری یاشایاراق آشی‌لاییرلار. اونلار بونونلا بعضی شئی‌لرین ساواش‌سیز-موحاریبه‌‌سیز ده مومکون اولا بیله‌جه‌یینی دونیایا بَیان ائدیرلر. بو گون آذربایجان گنجینه میللی-معنوی دَيَرلریمیز اؤیره‌دیلمه‌لی‌دیر. دوشمان ذاتن بللی‌دیر. اونا گؤره ده بو ایستیقامتده هر بیر گنج اؤز اوزه‌رینه دوشَن وظیفه‌‌نی یئرینه یئتیرمه‌لی اولدوغونو درک ائتمه‌لیدیر. هر ژورنالیست خالقین اؤولادیدیر. مطبوعاتیمیزدا آذربایجانچی‌لیغیمیزا خیدمت ائتمه‌لی‌دیر. خالقیمیزین موقدس نعمت‌لری کیمی عزیز توتدوغو معنوی-اخلاقی دَيَرلر هر مقامدا گؤز ببه‌یی کیمی قورونمالی‌دیر. بیر سیرا مرکزدن یؤنه‌تیلن موبتذل، پان فارسیست ژورناللارین یوروتدویویو آلقی اوپئراسیونو، سولچو تفککورون یاییلماسی، ائله‌جه ده گونئییمیزده نشر ایزنی آلان آشاغی ‌سایلی درگی‌لر، غزئت و ژورناللار، سؤزسوز کی، آذربایجان عائله‌‌سینه داخیل اولور، اوخونور و بؤیوکلو-کیچیکلی باخیلیر. تئلئویزییاداکی عئیبه‌جرلیک‌لر، ایستعدادسیز و شخصییت‌سیز گؤستَریش‌لرین گئریچی نوماینده‌لرینی، اونلارین گویا باریز اولان عمل‌لرینی طبلیغ ائده‌ن، بوش لاققیرتی‌دان باشقا بیر شئیه اوخشامایان وئریلیش‌لر، عکس اولونان رئکلاملار، کینوفیلم‌لر، باشقا میللت‌لره اؤزه‌للیکله بؤیوک تورک میللتینه و اونون میللی-معنوی دَیَرلرینه اولان حقارت و اهانت‌لرله دولو سریاللار اینسان حئیثییه‌تینه لکه گتیرن مقاملار، زوراکی فیلم‌لرین نومایشی، اصلینده ائفیری دولدورماق مقصدی اولسا دا، سؤزسوز کی، گنج‌لریمیزین اخلاقی دَيَرلرینین آشی‌لانماسینا حئسابلانمیش واسیطه‌‌لردیر. آنجاق توم بونلارا رغمن، وطنپرورلیک بیزیم خالقیمیزین قان یادداشی‌دیر. زامان اؤتسه ده، بو بؤیوک، بشری حیسس‌لر میللتیمیزین، خالقیمیزین حیاتیندا همیشه باشلیجا معیار اولموش، بیر کاراکتئر کیمی فورمالاشمیش، نسیل‌لرین فعالییتی‌نین فؤوقونده دایانمیشدیر.. میللی-معنوی ديَرلریمیزین، مقدس عنعنه‌لریمیزین مرکزی قودرت، شووونیست‌لر، پان فارسلار، ساغ-سول ایرانچی‌لار، کورد تئرورچولار و ائرمنی سویسوزلار طرفیندن سیخیشدیریلیب مقصدلی اولاراق کنارلاشدیریلدیغی بیر زاماندا، دله‌دوزلارین تورونا دوشن، ماددی و معنوی ایتکی‌نین گؤینَرتیسی ایللرله چکیلمیر. بئله بیر دورومدا گنج‌لییی، میللی-معنوی-اخلاقی ديَرلردن ساپیندیرماق میللته خیانت‌دیر. بونا اصلا یول وئرمک اولماز. اینگیلیس شاعیری "جورج هئربئرت" دئمیشکن: «اخلاقدان محرومسان‌سا، نه قده‌ر یوکسه‌یه قالخسان دا، یئنه هئچ‌سن».