قروپ‌لار و کانال‌لاردا گئتمیش آشاغیداکی یانلیش جومله‌لره دوزه‌لیش وئرمیشیک. (سایغیسیزلیق اولماسین دئیه آدلاری دییشمیشک.)

«قره داغ اولکه سی نین گور نئجه دیوانه سی یم. هم دوکتور یاشار، هم مهندس آنار هر ایکیسی توپراقلارینا اولان بورجلارینی وئردیلر... به قول آقای دوکتور: قره داغ توپراغی خیانت گوتورمز».

متنه بئله بیر دوزه‌لیش وئرمک اولار:

قاراداغ بؤلگه‌سی‌نین گؤر نئجه دیوانه‌سییم. هم دوکتور یاشار، هم ده مهندس آنار، هر ایکیسی، تورپاق‌لارینا اولان بورج‌لارینی اؤده‌دیلر. دوکتور دئمیش: قاراداغ تورپاغی خیانت گؤتورمز.

گؤردویونوز کیمی متنده ایملا قایدا‌لارینا رعایت اولونماییب، مثلن أک‌لرله کؤک‌لر آرالی یازیلیب. ”قره داغ“ سؤزونده آهنگ قانونو پوزولوب، ”اؤلکه“ و ”وئردیلر“ سؤزلری ایسه یانلیش گئدیب.

«منده اللها اند ورمیشدیلر پایلاشدیم یالاندی دوزدی بیلمیرم»

جومله‌یه بئله‌جه دوزه‌لیش وئرمک اولار:

منی ده آللاها آند وئرمیشدیلر پایلاشدیم. یالاندی، دوزدو بیلمیرم.

جومله‌نی دیلیمیزین قورال‌لارینا داها اویغون بیچیمده یازماق اولار:

آللاها آند وئردیکلری اوچون من ده پایلاشدیم. یالاندی، دوزدو بیلمیرم.

«بو قروپون یازیلی قوراللارین اوخویوب یارارلی پایلاشمالاریزلان قروپون گئدیشینده و دولاندیرماسیندا یاردیمجی اولون.»

جومله‌یه بئله بیر دوزه‌لیش وئرمک اولار:

بو قروپون یازیلی قورال‌لارینی اوخویوب یارارلی پایلاشمالارینیزلا قروپون دولاندیرماسیندا یاردیمچی اولون.

ریتوریک گؤزللییی نظره آﻻراق جومله‌نی ساده‌لشدیرمک ده اولار:

قروپون یازیلی قورال‌لارینا رعایت ائده‌رک، یارارلی پایلاشمالارینیزی أسیرگه‌مه‌یین.

* باشقا یئرلرده بللی سببه گؤره ”قروپ“ سؤزونو ”گروپ“ کیمی یازیرام. ألبته رسمی دیلده ”قروپ“ گئدیر.