آلئن دولئن، اورزولا آندرئس، چارلز برونسون، توشیرو میفونه و آکیرا کوروساوا

«قیزیل گونش« رئد سون وئستئرن فیلمینه بیر داها باخدیم. ترنس یانگ‌ین چکدییی بو کئیفییت‌سیز فیلمده گؤرکملی بیر آکتیور ایشتیراک ائدیر:‌ توشیرو میفونه (۱۹۲۰-۱۹۹۷). آکیرا کوروساوانین بیر چوخ کینو أثرلرینده رول ایفا ائتمیش میفونه‌نین اویون‌لاری لیریک بیر شعر قده‌ر گؤزل اولور. میفو‌نه‌نین قیرمیزی ساققال، راشومون، یئددی سامورای، و گیزلی ‌قالا فیلم‌لری کیمی شاه‌اثرلرده ایفا ائتدییی رول اونودولمازدیر.

آمما میفونه‌نین منیم اوچون أهمییتی بؤیوک نوستالژیک سجییه داشیییر. منیم بدیعی نثر یازماغیم بیرینجی درجه‌ده کوبایاشی‌نین تأثیری ایله باشلانیب، و کوروساوانین تأثیری ایله گئنیشله‌نیب. بو آرادا کوروساوانین ۱۶ فیلمینده رول آلمیش میفونه‌نین اویون قابیلییتی گؤزه‌للیک آبیده‌سی کیمی بلله‌ییمده حک اولونوب.

بوتون بونلارا باخمایاراق، توشیرو میفونه‌نین »قیزیل گونش« کیمی مضمون‌سوز بیر فیلمده اوینادیغیندان تأسسوف حیسسیمی گیزله‌ده بیلمیرم. گؤرونور آلئن دولئن و چارلز برونسون‌ون دا ایشتیراک ائتدییی بو فیلم، بازارین نبضینی توتماق اوچون چکیلیب. سونوجدا یاپون افسانه‌وی آکتیور أیلنجه‌ مدنیتی‌نین بورولغانینا سوروکله‌نیب.