آذربايجان توركجه‌سينده وئريليش يايان یئرلی راديو و تلويزيون كانال‌لاري گئنللیک‌له يانليش دانيشيرلار. ديليميزين کورلانماسیندا بونلارين بوراخدیغی بؤيوک ائتکی دانيلماز‌دير. بو بيلگي آراجلاري، اوخوجو، دينله‌ييجي و گؤروجولرین بؤيوك كوتله‌سي ايله دیالوگدا اولدوقلارینی گؤز اؤنونه آلدیقدا، مسئله‌نين اؤنمي داها دا آرتير.

گؤرونور، بئله بير آپاريجي مانعه‌دن يان كئچمك، ديلين آلین‌ یازیسینا گؤز يومماقدان باشقا بیر آنلام داشيماياجاقدير. بیلیریک يئرلي راديولار کوتله‌نين دانيشديغي ديلدن‌ داها آرتيق «جالاق» ديلده دانيشيرلار. بعضن تكجه فعل‌لري آذربايجان تورکجه‌سینده گئدن بو دانيشيق طرزيني، اؤز‌لليكله، آيري ـ آيري مسئول‌لارين چيخيش‌لاريندا آچيقجا گؤروروك. بو قارماقاريشيق اوسلوب تکجه باشی‌سویوقلوق و يا دجلليکدن سو ايچمير، اوچ باشليجا ائتکنه قاييدير: «سياسي تاپشيريق، جغرافي سپه‌لنمه‌لر، و تورکجه‌ميز خصوصوندا ساوادسيزليق». باخمایاراق کی، سون ایکی عامیل ده سیاستدن سو ایچیر.

سؤزسوز تحصیل اوجاغی اولمایان بیر دیلین بیرگه یازی اوسلوبونون فورلاشماسی چوخ چتین‌دیر. بو ایسه هر بؤلگه‌ده گلیشن، و او بیری بؤلگه‌نین یازیسی ایله اویوشمایان عئیبه‌جر یازی اوسلوبونا گتیریب چیخاریر. هر حالدا من بوردا تکجه اوچونجو ائتکنه توخونورام.