یئددی سککیز ایل بوندان قاباق، دانیشیق‌لاریملا یازیلاریمدا، ادبیاتیمیزدا یئنی‌لشمه‌نین حتی مودئرنلشمه‌نین گرکلی اولدوغونو وورغولادیغیما گؤره، چوخلو ادبی توپلوم‌لاردا دانیشیق آپارماغیمی ایسته‌دیلر. بو توپلوم‌لارین بیری ده تبریزین ساز-سؤز اوجاغی ایدی. آدیندان بللی اولدوغو کیمی ساز-سؤز اوجاغی شاعیرلرله آشیق‌لارین بیر یئره توپلاندیق‌لاری بیر درنک ایدی.

آشیق قافار ابراهیمی جناب‌لارینی ایلک دؤنه اولاراق ائله او ساز-سؤز درنه‌یینده گؤردوم. آذربایجان آشیق دب‌لرینه باغلی قالان بیر آشیق ایدی. بونا گؤره ده منیم سؤزلریمدن خوشو گلمه‌میشدی. آنجاق، من اونو یاخشی آنلایا بیلیردیم: یاشینین اقتضاسی اولاراق، منیم سؤزلریم‌له باریشا بیلمزدی. او بیر عؤمور آذربایجان آشیق صنعتینین دیبلی کؤکلو دب‌لرینه آرخالانمیشدی. بیردن بیره، آرخالاندیغی دب‌لردن قیریلیب، منیم وورغولادیغیم مودئرن‌لشمه گرک‌لرینه اینانا بیلمزدی.

سونرالار ساز-سؤز ادبی درنه‌یینین اوتورم‌لاریندان باشقا نئچه-نئچه آیری اوتوروم‌لاردا دا گؤروشدوک. باخیشیندا هله ده منیم ادبی باخیش‌لاریم‌لا باریشا بیلمه‌دییینی آنلادان افاده‌لر گؤرونسه ایدی ده، اونون حؤرمتینی ساخلاماغا، اونونلا سایقیلی داورانماغا اؤزومو گؤره‌ولی بیلیردیم. بونون دا ندنی اونون اردملی شخصیتی ایدی. او بیر عؤمور بیزیم تاپدالانمیش وارلیغیمیزی قوروماغا چالیشمیشدی. او هئچ زامان، آذربایجانیمیزین آلین یازیسینا قایغیسیز قالمامیشدی. اونون سازی، هر زامان آذربایجان آجی‌لارینا سیزلامیشدی.

اینانیرام، اونون اؤلمه‌سی ایله آذربایجان آشیق صنعتی دانیلماز بیر یوکوملولوک سیمگه‌سینی (سمبل تعهد) الدن وئردی. بو اوزوجو اولای اوچون آذربایجان آشیق صنعتینه، آذربایجان توپلومونا آرتیق آذربایجانین اؤزونه "باشین ساغ اولسون!" دئییرم.