کولت آذ تانینمیش شاعیر، یازار و میللی-مدنی فعال حبیب ساسانیانین میللی محبوسلار و اختلافلار لا باغلی آچیق مکتوبونو تقدیم ائدیر:

درین و دۆزگۆن بیر سیاست چی اوْلماغا، سیاست علمینی آکادئمیک اوْلاراق اوْخویوب بیلمک دن یاناشی، سیاسی باجاریق ( نبوغ ) گرکیر.

گئچن گۆنلرده آزربایجانین میللی حرکاتیندا بگنیلمز و اۆزۆجۆ قارشی دورما و تخریبات لارلا ایلگیلی، چوْخلو چاتیشمازلیقلار و آجی گئرچکلر اۆزه چیخدیلار.

آرتیق آچیقلاما دان اؤنجه، بیلمه لییک؛ ساواشان ـ ساواشانا شیرنی قوتوسو آچماز. باشقا سؤزله، « قادان آلیمین جاوابی، باشینا دؤنۆم » و « زهرمارین جاوابی ایسه، چوْردور ».
بیر ده، آتالار دئییبلر: « ساواشاندا ائله ساواش، باریشماغا یئر قالسین ».

یازیقلار اوْلسون بیزیم میللت، سیاست سیزلیک دن، سیاستچی اوْلوبدور. بو آنلامدا؛ گۆندم ده اوْلان آجی گئدیشاتلارا معروض قالمیش بیر چوْخ میللی چالیشقان، گئرچک دن آچماز بیر دورومدا قالیبلار.

اؤرنک اوْلاراق؛ بیر سیرا صادق و صمیمی میللی چالیشقانلار بیزه سانال و گئرچک دۆنیادا موراجعت ائده رک، ایندیلیک ده دوستاقدا اوْلان میللی فعاللاریمیزدان حمایت اومورلار.

بیز ایسه بونلاری ائشیدنده، چوْخ کؤوره لیریک. بو یوْلداشلاریمیز بیلمه لی دیلر؛ حیاتینی میللی اینامینا حصر ائدن بیر فعال، نئجه اوْلا بیلر دوستاقداکی فیکیرداشلارینین طالعینه لاقید قالسین؟

عزیز و میللی دۆشۆنجه لی باجی ـ قارداشلار؛ باخمایاراق میللی موباریزه میز اۆزره، من اؤزۆم، بعضا بیر باشا و بعضا دوْلایی دان بیر سیرا فیکیرداشلاریمیزین وریندن ( بیله رک یا بیلمه دن ) یئرسیزجه سینه سوچلانیب و تؤهمت لره معروض قالمیشام، آنجاق میللی اینامیدان بیر آن بئله سوستالمامیشام.
بئله لیکله، اوْلسون سایین دوکتور لطیف بی حسنی ـ سایین عباس بی لسانی، سایین حکیمه خانیم احمدی باجیمیز ـ و اوْنلارلا یاناشی بۆتۆن میللی قوروپلار و تشکیلاتلاریمیزا باغلی و یا مستقل چالیشان دوستاقلاریمیزین اؤزگۆر بوراخیلمالاری تکجه بیزیم یوْخ، تۆم آزربایجان خالقینین اۆرک ایستکلریدیر.

بو گۆن دۆنیادا و رئگیوندا سیاسی گئدیشاتلاری و اوْنونلا یاناشی میللی منافعیمیزی گؤز اؤنۆنه آللاراق، بیز اۆرک دوْلو حۆزنیله، میللی حرکاتیمیزدا، باش وئرن قارشی دورمالاری و تخریباتی قینایارکن، کدریمیزی بیلدیریب و صمیمیت له، (خالقیمیزا یاراماز بو کؤتۆ داورانیشلارین) بیر باشا قاپانماسینی دیله ییریک.

زامان اؤتریسی، اَن عادل حاکیم اوْلوب و اوْلاجاق.

میللی حرکاتیمیزین چئشیتلی مئدیالارینی دوْلاندیران سوْی داشلاریمیز، باشقالارینین موباریزه یوْل ـ یؤندم ریله باغلی بیر باشا قرار وئریب و اوْنلاری خائن ـ ساتقین و... آدلاندیرماق، یوخاریدا سؤیله دیگیم سیاست سیزلیکدن گؤزه له نیر.

گلین اَلیمیزده اوْلان داشلاری، اؤزۆمۆزه یوْخ، یۆز ایله یاخین میللی کیملیگیمیزی هَده له ین، ماسوْنلارین تتیگی، ایرقچی فارس شئوونیسملرینه ساری آتاغین.

میللی اؤزگۆرلۆک اومودویلا: حبیب ساسانیان ( یاکاموز )