داود عبدی

-بایرام آیی نین ۲ سی دونیالیق آنا دیلی موناسیبتیله

"سن دئییرسن بو اولکه ده من تکم
من دئییرم آللاهیمیزدیر حَکَم
سنکی بئله یاپیشیبسان دیلیندن
نه اولوبکی من دیلیمدن ال چکم"

بیر ایل کئچیب دولاندی و یئنی بیر آنا دیلی گونو گلیب یئتیشدی

دیللری اسیر بیر خالق ایچره، بوگون چوخ غریب بیر گون کیمی آلینیر

۱۳۸۳ ده آنا دیلی مراسیملری لغو ائدیلسه ده

۸۵ و ۸۶ دا خییابانی اعتیراضلار کئچیریلدی

داها او ایللردن بویانا بوگونو عزیز توتانلار اوزره، سیخینتی لاری آرتیریریب ،هربه-زوربانی چوخالداراق

آنا دیلی مراسیمی قورانلارا ۱۵ ایللیک آغیر زیندانلار دا کسیلدی...

نییه؟

نه دن؟

آنا دیلی داعیش دیر؟ تئرور اورگوتودور؟ نه دیر؟؟ اتوم بومباسی دیر؟

هئچ بیری دییل آنجاق،بونلارین هامیسیندان گوجلودور

نه دن کی فارس دیلینین کور قوللوقچولاری هامیدان یاخشی بیلیرلر بو اولکه ده غئیر فارس بیر دیل رسمی اولسا، شیرین!

دیللری تکجه ۲۰ ایل داوام گتیره بیلمه یه جک و او اوزدن دیلیمیزین تدریسی نین اونونو کسیب و اللریندن گلن خییانتلری اسیرگه مه ییرلر
و ان سئویندیریجیسی بودور، دیلیمیزین گوجو و دیللری نین گوجسوزلوگو اونلارین جانینا قورخو سالیب و بو قورخونو سوموکلری و ایلیکلری له ده بئله حیسس ائدیرلر،آنجاق بونا اینانیریق آنا دیلیمیز چوخ یاخینلاردا اوز یئرین تاپیب و تورکون ده مدرسه سی اولاجاقدیر.
بونا اینانیب بو دیلی کونوللرده یوخ، گیزلی کیلاسلارلا،نئت ده یاشادیریق و اوخویوب، اویره نیب ، اویره دیریک.

چیرکین شووونیستلرین اودو پارتلاسین نه قدر توتورسونوز توتون اویره تمن لریمیزی، بو آغاجین هر بوداغیندا یئنی بیر دیل کیلاسی گویه ریر
و بو دیلی یاشادیریق و یاشاداجاغیق.