افغانیستانلی موغننی غوغا تابانین والنتاین گونونه حصر ائتدییی ماهنی بؤیوک ماراقلا قارشیلانیب.

افغانیستان طالیبانی ایله آپاریلان باریش موذاکیره‌لری وطنداش‌ توپلومونو قورخوتماغا باشلاییب. دوحه، موسکوا، ایسلام‌آباد و ابوظبی‌ده آپاریلان بو موذاکیره‌لرین آماجی قادین حقوقو کیمی آزادلیق‌لاری باریش‌لا دییشمک اولا بیلر. بو ایسه اؤلکه‌نین قارانلیق ایل‌لره دوغرو گئری قاییتماسینا گتیریب چیخارا بیلر. بو ائحتیمال بؤیوک آیدین کوتله‌سینی اوشوندورمه‌‌یه باشلاییب. اوسته گل بعضی کیچیک حادیثه‌لری. بیر موددت اؤنجه دین خادیم‌لری‌نین ایسته‌یی ایله هرات ولایتینده والئنتاین‌ تؤره‌‌ن‌لری یاساقلانمیشدی. چوخ گومان کی، او اوشونمه‌لرله بو کیمی یاساق‌لار تابان‌ین ایفا ائتدییی ماهنی‌نین داها چوخ سئویلمه‌سینده ائتکیلی اولموشدور.

بو آرادا دیققتی چکن مسئله، تابان‌ین ماهنییا گؤستریلن تپکی‌لره اؤزل باخیشی‌دیر. او کوتله‌وی شعورون قورخونج‌ ماهییتینه توخونور. اونون سؤزلریندن بئله چیخیر کی، هانسی‌سا عملی قوتساللاشدیران، بیر ماهنینی عرشه قالدیران کوتله، گؤزقیرپیمندا دییشه بیلر. همان کوتله موغننینی فاحیشه آدلاندیراراق داش‌قالاق/سنگسار ائده بیلر. چونکو بئله بیر توپلومدا فردیت یوخ‌دور. اینسان‌لار فردیت‌لرینه آرخالانماقدانسا کوتله‌وی‌ جوشغونلوق‌لار و هیجان‌لارین اسیری‌دیرلر. غریبه‌دیر، اونون بیلینج‌دولو سؤزلری بیره‌ر‌-بیره‌ر بیزه ده عایددیر. بیز ده بونو اونودوروق کی، فرد اولاراق مسئولیت داشیییریق. فردییت اؤزگورلوک قایناغی‌دیر.

غوغا تابان‌ دئییر: بو ماهنینی ایفا ائتمکده «منیم ساده بیر مقصدیم واردی: ماهنی واسیطه‌سی ایله طالیبانی دوروما قارشی مؤوقعیمی بیلدیرمک. چونکو طالیبان شوبهه‌یه قاپیلمادان هر بیر آوازین حرام اولدوغونو وورغولاییر. [منیم ماهنیما] گؤستریلن تپکی‌لر گئنیش ایدی. بو گئنیش تپکی‌لر، اومودوئریجی اولدوقلاری قده‌ر نیگرانلیق تؤره‌دیر. باش‌وئرن‌لرین پوپولیستیک یؤنو آیدین‌دیر. مسئله‌ده منه آرخا دورانلارین چوخونون طالیبان تفککورونه قارشی دوردوقلارینی سانمیرام. بو ایسه قورخونج‌دور. چونکو همین اینسان‌‌لار ساده‌جه بیر کیچیک بهانه ایله داش‌قالاق/سنگسار ائده بیلرلر، فاحیشه آدلاندیرا بیلرلر، شهر اورتاسیندا اودلایا بیلرلر. طالیبانی یاراتمیش ایجتیماعی اورتامدا، گؤز قیرپیمیندا هامی بیرلشیر، هانسی عملی پیسله‌ییر، یا قوتساللاشدیریر. طالیبانا قارشی چیخماق بیزیم اینسانی گؤره‌ویمیز اولسا دا، بئله‌جه تپکی‌‌لرین قورخونج طرفینی، و فردییتین یوخلوغونو اونوتماماق گره‌ک.
بوردا فردییتین یوخلوغو دهشتلی‌دیر. طالیبان‌لا گئرچک موباریزه‌نین یولو فردییت‌دن کئچیر.»

ایندی ایسه ماهنی‌نین اورژینال متنی ایله چئویرمه‌سی:

#اؤپورم_سنی

سئوگیدن، اوموددان، یاریندان قورخمورسان

طالیبان‌لار ایچینده اؤپورم سن قورخمادان

مسجیدین کونجونده اؤپورم، سن تیتره‌مه‌دن

ایده‌نین وحشی قوخوسو اورتاسیندا قورخمورسان

اؤپورم سنی آغلامسینمالاردا، ماتم‌لرده

اؤپورسن منی اینتحارچی‌لار جایناغیندا

اؤپورسن منی اینتحارچی‌لار جایناغیندا.

سن اینانیرسان، اؤپوجوک ایسه نامازین‌دیر

سن سئچیلیرسن، دیره‌نیشین ایسه اؤپوجوک‌لرین‌دیر

یارا، قان و قابارلار ایچینده دوداغی اؤپ

آفتومات‌لاردان یاغان قورشون‌لار ایچینده دوداغی اؤپ،

اؤپورسن منی اینتحارچی‌لار جایناغیندا

اؤپورسن منی اینتحارچی‌لار جایناغیندا.