گؤرکملی صعنتکار آشیق قافارین رحمته قوووشدوغو گون‌لری "آشیق" سؤزونون نئجه یازیلیشی باره اوچ- بئش سطیر یازدیم. دیوان لغات الترکده واخت‌آشیری آختاریشیما رغما آشیق سؤزونون بو اؤنملی قایناقدا یئر آلدیغی گؤزومدن قاچمیشدیر. آمما سایین حیدر بیات دیواندا همین کلمه‌نی آراییب تاپمیشدیر. بیاتین قیسا یازیسینی آزاجیق ائدیتله تقدیم ائدیرم:

«آشیق کلمه‌سی‌نین کؤکو حاقدا چوخلو آراشدیرمالار آپاریلسا دا کاشغرلینین گتیردییی بیر مدخلی ند‌نسه هئچ کیم وورغولاماییبدیر. کاشغارلی محمود اَشُقلَتی (آشوقله‌دی، آشیقلادی) فعلینی بئله آچیقلاییر:

اول اَﭬکا اشقتی، ای اشتاق الرجل الی بیته و غیره و کذالک کل مولع مشتاق. اَشُقار _ اَشُقماق. (دیوان الیازما نسخه ص 105)

کاشغارلی عین ماده‌نی باشقا یئرده‌ ده عینی آنلامدا گتیریب‌دیر.

بسیم آتالایین بو مدخلدن چئویریسی: ol eşge aşuktı او ائوینی اؤزله‌دی، باشقاسی‌ دا بؤیله‌دیر،‌ بیر شئیی اؤزله‌ین، بیر شئی اوچون دوشگون اولان کیمسه ایچین ده بؤیله دئنیر.

(Divanü Luğat-it Türk tercemesi, c 1, s191)

دیوان لغاتدا بو مدخلی گؤرندن سونرا آرتیق اوزان آنلامیندا اولان آشیق/عاشیق کلمه‌لرینین عاشیق فورماسیندان واز کئچیب، آشیق کیمی یازماغا قرار وئردیم.»