-خوجالی فاجیعه‌سینی کامنتلرله، پوروفایل شکیللرینده یوخ، اۆره‌کلرله، عملده عزیزله‌مک گرک.

84-جۆ ایل، بایرام آیی‌نین (ایسفندین) یئددینجی گۆنو تبریز،شهناز خییاوانی، ارمنیستانین‌ خلیفه‌گرلیک ائوینین اؤنو.

هر یان قالابالیق، قالدیرملارلا(پیاده‌رو) خییاوانلار آدام سئلینی چکه بیلمه‌ییرلر میللت‌له میللتچی قایناشماقدا، کیمی پالتار، باشماق و... آلماغا چیخیب
کیمی‌سی ده اونودولماغا دوغرو گئدن مظلوم خوجالی‌لارین بوغولموش سسی اولاراق، اونلارین حاققینی آلماغا، یادلارینی عزیزله‌مگه...
لاپ دغروسو گۆن آل-وئر گۆنویدو چوخلاری دوروب قیراقدان باخاراق خلیفه‌گرلیک اؤنونده یئره اوتورمادیلار و چوخلاری شهناز چارراهیندا بیانییه اوخونارکن باخدیلار...

چوخلاری دا یاواشجاسینا، دیللری آلتیندا "قاراباغ بیزیمدیر بیزیم قالاجاق" شوعارینی دئییب، اۆره‌کلرینده قان آغلاییردیلار، اوگۆندن ۱۳ ایل کئچسه‌ده، چوخ شئیلر یادیمدا،.... آنالارین نیگاران باخیشلاری‌لا دولموش گؤزلری و آتالارین اوموددان ایشیقلانان گؤزلریله پولاد ایراده‌لی یئنی‌یئتمه‌لریمیزله گنج‌لریمیزین دایانات گۆجلری‌له قورخمامازلیق‌لاری، هله ده یادیمدادیر دوداقلاری ترپنمه‌دن بیر افسرین، صلواتلا باشلایین دئمه‌گی، و آردیجا گؤیلره قالخان آللاه‌و‌اکبرلره،قارشی چیخیب یاللییا قالخان باتوملارین لزگیسی...

بلکه شوشادا داها چوخدان آللاه‌و‌اکبر دئییلمه‌ییردی آنجاق اوگۆن شهناز خییاوانی ائله شوشایدی، آغدام‌ایدی، خوجاوندایدی، لنکران‌ایدی، کلبجرایدی، فیضولی‌ایدی و لاپ دوغروسو بئشیک‌لرده دوغرانان خوجالی کؤرپه‌لری‌ایدی، قارینلاری سۆنگولرله بویلانان باکیره قیزلاریمیز و و و...

لاپ دوغروسو اوگۆن قاراباغ‌ایدی تبریز آیاق‌لارین هر یئره گۆپسه‌نیلدیگینده ایروان‌دا قیزیل خاچلی سارای‌لار تیتره‌ییردی و تۆرکون تۆرکدن باشقا دوستونون اولمادیغینی یاشیل گئییملی‌لر گلرکن گؤردوک...

اوگۆن ازیلیب، دؤیولوب چوخ اینجیسه‌یدیک ده، اۆچ آی سونرا خورداد گۆنلری‌نین آکسییالاریندا، خوجالی‌لی سویداشلاریمیزی آناراق، گۆنئی‌ده خییابانی چیخیشلارا ایستارت اولان خوجالی فاجیعه‌سینین شهیدلرین یادلاری داها دا عزیزلندی.

اوگئجه وطن اۆچون تکجه آغلامادیق،اومودلانیب - سئویندیک و حاققی باغیرماق اولارمیش دئیه خورداد آییندا اولونان تحقیرلره سوسوب باخمادیق.

دده‌قورقود دئمیشکن؛ تورپاغی بئجرمه‌سن قوروماغا دَیمز، قوروماسان بئجرمه‌یه گلمز و او چاغین گنج‌لری ایلک دفعه اولاراق اوگۆن تورپاغیمیزا یییه دوروب و قارشیلیغین اۆچ آی سونرا آلدیلار.

ـ‌بو یازی بیلدیر [خوجالی سوی قیریمی‌نین ایل دؤنومونده] یازیلمیشدی، بو ایل بیر بالاجا دییشیک‌لیک وئریب یئنی‌دن پایلاشدیم.