دونن (بايرام آيى نين ١٠-اونجو گونو) قوردلار دَره سينده، گونئى آزربايجان ميللى تاخيمى اولان تيراختور اوْيونوندا، آزربايجان گنجليگى وار-گوجو ايله "قاراباغ بيزيم دير، بيزيم قالاجاق" شوعارينى سَسلنديريب، ايشغالچى ارمنيستان بايراغينى اوْدا چكدى. ائله جه "قاراباغ آزربايجان توْپراغى دير" يازيلى بؤيوك بير بَنئر گؤزلر اؤنونده سَرگيلندى.

بو اوْلايلار كئچن گونلر خوجالى فاجيعه سينين ٢٧-اينجى ايل دؤنومو، ارمنيستان باش باخانى پاشينیانين ايرانا چاغريلماسى، آرديجا آرارات آدلى ارمنى كولوپوندا "قاراباغ ارمنيستانيندير" يازيلميش بَنئرين قالديريلماسينا بير تَپگى اولاراق كئچيريلدى.

اومورام، شعوبى حاكيميتين فارس شوونيزم قولو، باشدا دولت، اؤزلليك له ديش ايشلر باخانليغينين پان ايرانيست سياستچى لرى، ايكى گؤز ، ايكى قولاق دا بوْرج آليب! بو يانيتينى گؤروب،ائشيديب، اوْ آخساق دوشونجه لرينه سيغيشديريب، بو تَپگى ده اولان ٤٠ ميليون توركون آچيق-آيدين مئساژينى آلميش اولسونلار.

كَسين بونو بيلمه لى ديرلر! بو تَپگى لر آزربايجان ميللى حركاتى وَريندن وئريلن جيددى بير اويارى دير. دئمك حاكيميت آنتى تورك سياست لرينه بئله داوام ائديرسه، آرتيق فوتبال مئيدانيندان دَييل! بلكه وار اولان بوتون آلانلاردا قيناما يؤنلو (اعتراضى) ميللى-مدنى چاليشمالار ، اولوناقلارين هاميسينى قوللاناراق گَرچك لشه جك دير!

وورغولامالى يام، سوْن ايللرده بير سيرا چاليشقانلاريميز سانكى مدنى چاليشمالارى ساده جه قلم ساواشى كيمى آلقيلاييبلار. سانال اوْرتامدا بير شَكيل پايلاشماق، قزئته لرده، درگى لرده يالنيز يازيب-پوْزماق مدنى ديره نمگين بير يوْلودا اولسا آنجاق تك باشينا يئترلى دَييل! بلكه اولوسلار آراسى ياسالارا داياناراق هله لاپ بو آخساق آنا ياسانين ٢٧- اينجى ايلكه سينده توْپلاشمالار، اوْتوروملار، آياقلانمالار (راهپيمايى)،... مدنى چاليشمالار چَرچيوه سينده بير اولوسون ايلكين، دوغال ائله جه مشروع حاققى اولاراق تانينيبدير.