ایستیردیم یئنی ایلی، گولر اوزله، سئوینج دولو اوره کله، عزیز خالقیمیزا تبریک دئیه‌م. اما نه یازیق کی مملکتدارلیق قورموموزون لیاقتسیزلیگی، بایرام یئتیشیب یئتیشمز، شیرین سویوموزا زهر قاتدی.
ترکمن ائلیمیزین مازندران آدلی ماحالیندا، آلله‌ین اتحاف ائتدیگی نعمت ساییلان یاغینتی بلایه دؤنوب سئل اولدو‌، نهایت، سئل آپاردی خالقین ائو ائشیگینی، بایرامین عزیز گونلرینده.
ندنسه بیزیم نسلین تقدیری بئله یازیلیب گویا، شیرین سو حرام یازیلیب آغزیمیزا سانیرام.‌
مازندران دا یاغیش هر زامان گور و حیزلی یاغار.
سوریه، فلسطین، لبنان، عراق، یمن جماعتینه یییه دوران مسئول لاریمیز، قیریخ ایل انقلابدان سوووشماغینا باخمایاراق، ترکمن خالقی نین بو یاغینتی پروبلمینه هئچ بیر چاره قیلمادیلار بو قیریخ ایلده. هئچ بیلمیرم خارجی ئولکه لره خدمت لریمیزدن سئوینیم، و یا ترکمن خالقی نین قارا باختینا قان آغلییم.
بلکه ده قوروتماغا محکوم اولموش بیر اورمیه گولو اولسایدی مازندراندا، یوزلرجه سد و باراژ ویریلاردی جوشوب داشان چایلارین اونونده، سویون بوغوب باسماق اوچون.‌اوندا مازندران دا داها سئل ماجال تاپمازدی کی باراژلار بوغونتوسوندان جان قورتارسین، هاردا قالسین کی آشیب داشیب دوققوزا یاخین ترکمن شهرین آلتینا باسسین بایرامین گونو.
اینانین اصلا ایستمزدیم دوخسان سکگیزینجی ایلین ایلک یازیسین بو تیپ بیر دیالوگلا یازیم.اما نه ائدیم کی اوره گیمین باشی گوینور بو دورومدا.
اولو تانری سنی آلله لیغینین شرافتی، بیز ایران تورکلرین بو بلاتکلیفلیکدن قورتار.