یاشادیغیمیز توپلوم و ائولرین دانیلماز معمارلاری قادینلاردیر. کیشی‌سینی ایتیرمیش عاییله‌لر، آیاق اوسته قالیب یاشاییر، آما چوخ واخت قادینی ایتمیش ائولرین داغیلماسینا شاهید اولوروق.

بو قادینلیغین گوجودور. گوج دئدیکده فیزیکی قدرت سؤز قونوسو دئییل، بلکه هدف اوغروندا دؤزوملو، عینادکار و داواملی اولوب، اونا اویغون آددیملاماقدیر. بو گوج هم اؤزونو، هم ده خالقیمیزی بو آجیناجاقلی دورومدان قورتارابیلر منجه. دیلیمیزده دورمادان آخان نسنه‌لری سویا بنزه‌دیریک و قادین همن سودور. بو سو هرنه‌یه قصد ائدرسه اونو یقین الده ائده‌جک. اونا گؤره خالق آراسیندا بئله بیر مثل واردیرکی، سو داشی قوما چئویرر، آرواد کیشینی موما.

باشقا کولتورلرده، قیز و قادین حاقدا ضعیفه، عجوزه و کمینه کیمی آلچالدیجی و اونلاری باجاریقسیز و گوجسوز گؤسترن ایفاده‌لر وارسا، بیزیم کولتورده بعضن، قیز و قادین گوجلو و یئنیلمز تصویر ائدیلمیشدیر. دده قورقود کیتابیندا قانتورآلی_ سئلجان خاتون سؤیله‌شیسی، سئلجان خاتونون ظفریله بیتیر و دیوان الغات الترک، قیزلارین یئنیلمزلیگی و گوجوندن یازیب، خالق آراسیندا بئله بیر مثلین اولدوغونو وورغولاییبدیر: قیزلا گورشمه، قیسراقلا یاریشما.