دئییشلره گؤره آذربایجاندا بیر ایل قیش تئز گلدیگی و هاوا چوخ سویوق اولماسینا باخمایاراق هامان ایل قیش فصلی چیخمادان بایرام قاباغی هاوالار ایسینه رک طبیعت آییلماغا باشلار. بو آرادا "خدیجه خاتین" آدلی مال و حئیوان ساخمالاقلا اوغراشان و مشغول اولان وارلی کارلی بیر قادین وار ایمیش.

خدیجه خاتین کئچن یایدا ییغدیقلاری اوت و علفلری حیوانلارینا یئدیردیگی و داها یئدیرمگه اوت و علفی قالمادیغی اوچون حیولانلارینی طبیعت اوتلاغیندا دویورماق اوچون گون سایارمیش. یازدان یئددی گون (بیر هفته) گئتدیکدن سونرا آرتیق هر یئری اوت و علف باسماغا و انسانلار یایین گلیشی خیالینا قاپیلماغا باشلارلار. بئله لیکله خدیجه خاتین یازین سون آیی گلمیش، یایلاق واقتی اولموش دئیه آتینی مینه رک یایلاغا گئدر و یایلاغین نئجه اولدوغونو یئرینده اؤیرنمک ایستر. خدیجه خاتین یایلاغین دوروم و وضعیتی نی دوغرودان دا یایا اویغون گوللو، چیچکلی، اوتلو و علفلی گؤرر.

بئله لیکله تئزلیک و عجله ایله قیشلاغا دؤنه رک کؤچونو چاتماغا و یایلاغا چیخماغا قرار وئرر. خدیجه خاتین یازین اون ایکیسینده یایلاغا چاتار. خدیجه خاتین یایلاقدا بیرینجی گئجه نی گئجه لرکن گئجه قار یاغماغا باشلار. خدیجه خاتین صاباح یوخودان قالخاراق هر یئری قارلی و مال حیوانلارینی اؤلموش گؤررکن قاباقکی گول، چیچکدن هر هانکی بیر ایز و اثر گؤرمز. بئله لیکله خدیجه خاتین جانی نی گؤتوره رک سویو سوزولموش بیر داها تعلیم تلسیک قیشلاغا گئری دؤنر.

او گوندن باشلایاراق آذربایجان تورکلوگو آراسیندا یازین بیرینجی آیی نین اون اوچونجو گونونه قوشقو و شک ایله یاناشار. بئله لیک ایله هر ایل بیر سیرا انسانلار بایرام قاباغیندا ائولرینده گؤی گؤیه رنتی بسلمک، سمنی پیشیرمک و گؤی گؤیه رنتینی ده اؤزلری ایله گؤتوره رک یازین بیرینجی آیی نین اون اوچونده کئچه طبیعته چیخار، طبیعتی گزیب و سئیر ائتدیکدن و شادلیق ائتدیکدن سونرا آپاردیقلاری گؤیرتیلری طبیعته آتماقلا یاز فصلی ایله باریشمیش اولار.