1397- جی ایلین اسفند آیی نین 28- یندن بو گونه کیمی (17فروردین 1398) تلگرام،اینستاگرام، فئیس‌بوک، تویتر و وئبلاگ صحیفه لریمی ایزله‌ین سایین و حؤرمتلی ایزله‌یجیلرله ارتباطیم کسیلمیشدی؛ بو ارتباط کسیلمه‌نین ایکی علّت و نَدنی واریدی.

بیری، یئنی ایلین بو گونلرینده گؤزل آذربایجانیمیز، آتا-آنا یوردوموزدا سَفَرده اولدوغوم و کئچیردیگیم گونلرین چوخونو گؤزل طبیعت و فضادا اولدوغوم لاکین اینتئرنئت گووجونون ضعیف اولماسی و اصلینده و اؤنملی علّت 1397- جی ایلین اسفند آیی‌نین سون گونلرینده جیب تئلفونومون تهراندا اوغورلانماسی و داها بو گونلرده قیمتی آزدا اولمایان اندروید جیب تئلفونو آلماغا یئترلی پول و واختین اولماماسی سبب اولدو تعطیل گونلرینده حتی اینتئرنئت گوجلو اولان منطقه‌لرده اولدوغوم زاماندادا صحیفه‌لریمده بیر مطلب پایلاشا بیلمه‌ییم.
باشقا بیر علّت‌ده بو مسئله‌نی چتینلشدیرمیشدی، اودا اینتئرنئت صحیفه‌لریمین هئچ بیریسی‌نین شیفره‌سینی‌ اؤزومله گؤتورمه‌میشدیم تا قارداش و فامیللرین موبایل‌لری ایله صحیفه‌لریمده یئنی مطلبلر پایلاشام و دوستلارلا ارتباط قورام.

بو ایکی هفته‌ده ارتباط قورا بیلمه‌دیگیم حؤرمتلی و سایین دوستلارا درین سایغی و سلامیمی تقدیم ائده‌رک آرزو ائدیرم یئنی ایل اونلارا و بوتون دونیا انسانلارینا اوغورلو و برکتلی ایل اولسون و دونیا اوزو هرجور ظولوم،استبداد،آیری سئچگیلیک،سویچولوق،اؤلوب-اؤلدورمه و ساواشلاردان اوزاق اولسون.

بو ایکی هفته‌ده برکتلی ساییلان یاغیش نعمتی چوخلوغو ‌نتیجه‌سینده اؤلکه‌ده سئل فلاکتینه دوچار اولان وطنداشلارین غم و کَدَرینه اؤزمو شریک حیسّ ائده‌رک اولو تانریدان اونلارین دونیادان گئدنلرینه رحمت و قالانلارینا صبیر و دؤزوم آرزو ائدیرم.

بو ایکی هفته‌ده منه بایرام تبریکی و باشقا اؤزل پیام یوللایان دوستلارا درین تشکّورلریمی بیلدیره‌رک آدلارینی آپاردیغیم دلیل‌لره گؤره اونلارا جاواب یازا بیلمه‌دیگیمه گؤره اونلاردان عوذور دیله‌ییر، اونلارا اوغور و موفقیت آرزو ائدیرم.

آرزوم وار یئنی ایلده کئچن ایلین عکسینه، میلّتچی‌لر آراسیندا سلیقه اختلافلارینا سون قویولسون و ال - بیر، ائل- بیر، یئنی هدف و آرزولارلا و تام اراده ایله انسانی حقلریمیزه چاتماغا و مدنی یوللا ایره‌لی آددیملار آتماغا بیرلیکده چالیشاق!