نئچه ايل دير، آپريل آيى نين ٢٤ - اونجو گونو ( گولَن آيى نين ٤- دو)، ايراندا يوخ درجه ده آزينليق اولان ائرمنى لر، بير اؤتَك سَل (تاريخى) يالان اولان- ائرمنى سوْى قيريم اويدورماسينى،هايقيراراق، فارس شوونيزم حاكيميتين تورك-ه قارشى (آنتى تورك) سياست لرى كؤلگه سينده، تام گوونلى بير اورتامدا، تهران خياوانلاريندا آياقلانماغا دوروب، تورك-ه اؤلوم شوعارى سَسلنديرير. بو اوْلايا كئچميشده آزربايجان اولوسال-اويقار چاليشقانلارى اعتراض ائتميشلر آنجاق بو ايل دوروم تام باشقا اولا بيلير.

آزربايجان ميللى حركتى اؤزلليك له كئچن اوْتوز ايلده اولوسال آماجلارينا وارماق ايچين سيناديغى يوللار، ائله جه ألده ائتديگى تجربه لردن يارارلاناراق، تام گَليشميش بير اويقار حركته چئوريليب دير. بوگون ميللى حركت آزربايجان اولوسال منافعينى قوْروماق ايچين، توتوملارينى اوزون سوره بير باخيش لا آراشديريب- دوشونمه يى باجارير.

منجه بير نئچه اولوسال-اويقار چاليشقانيميزين چاباسى سوْنوجو يارانان " ارمنى تظاهراتينا قارشى كمپين" يالنيز ايران چَرچيوه سينده باش وئرن سياسى بير اوْلاى دَييل! بو يولدا ألده ائده بيله جه ييميز اوغوردان، گونئلى-قوزئيلى ( بوتوْو) آزربايجان بيرده تورك دونياسى يارارلانير.

باخماياراق بير سيرا آزربايجان ميللى حركت آدينا چاليشانلار بو كمپين ايله ايلگيلى سوْيوق داورانيرلار آنجاق اونلارا دئديگيميز-وورغولاديغيميز ايكى قوْنو وار:

١- بيز نئچه آى اؤنجه -ايروان باش باخانى -پاشينيانين خوجالى فاجيعه سى ايل دؤنومونده ايرانا گلمه يينى، ائله جه آرارات كولوبوندا قاراباغ حاققيندا اولان ادعالارا تَپگى گؤسترديك! او حركت دوغرودورسا! آرتيرمالى يام ائله بو كمپين او ترپَنيشين آرديجا گلن أن گره كلى آدديم دير. هله بونون آرديندا تكجه قوزئى آزربايجاندا خوجالى، قاراباغ ، ... دَييل بلكه گونئى شَهرلريميرده اورمو، خوْى، سلماس، ... دا، ائرمنى لرين ياراتديغى تورك سوْى قيريم قونوسونو داها آرتيق گونده مه گَتيريب، دونيا سَويه سينده چاليشمالى ييق! بو گون ميللى حركت يالنيز تَپگى گؤسترمك دَييل بلكه بوتون گوجو ايله چئوره سينده كى دورومو ائتگى له ين بير آخيما دؤنوشمه ده دير.

٢- بو كمپينه قاتيلماق پراكتيك چاليشمالارلا قارشى دورماق يوخسا اونا اينانماماق آنلاميندا دَييل! بلكه تام ترسينه، بو كمپين حتى پراكتيك چاليشمالارا گيريش اولاراق بير اؤن آدديم ساييلير. منجه " سانال اورتامدا پوپوليست داورانيشلار" كيمى سؤزلر ده بو كمپينه قاتيلانلارين چوْخونا ياراشمايان بير آتماجادير. ائله جه "بيز حاكيميتى قبول ائتمه ييريك دئيه اوندان بير شئى ايسته ميريك" دئمك سياسى- حقوقى ايلكه لرله اويغون ساييلمايير.

بيرينجى وورغولامالى يام؛ بو كمپينى يولا سالانلارلا اونا قاتيلانلارين چوخو قاباقجالار پراكتيك اولاراق تهران ، تبريز، اورمو، ماراغا ، ...خياوانلاريندا اعتراض ائديب- توتوقلانان چاليشقانلاريميزلاردانديرلار. ايكينجى؛ بو كمپين دَن بير سوْنوج أله گلمه ديگى دورومدا- باشقا سؤزله حاكيميت بو كمپينين ساوينى گؤرمه مزدن ارمنى لره آرخا دورورسا- ميللى حركتين جيددى حركته كئچمه سى ايله پراكتيك تَپگى لر ، ميللتيميز وَريندن داها آرتيق آلينا بيلير.
گَنل اولاراق آرتيرمالى يام ميللى حركت بير اولوسال- اويقار حركت چَرچيوه سينده اؤز ايستَك لرينى دونيا سَوييه سينده تانينميش أن اويقار، أن ياسال، أن تانينميش يوللارلا ايسته ييب- آلماقدادير. آنجاق يئرى گَلميش كن اولوسال منافعى اوغروندا داها كَسگين، داها ائتگى لى حركته كئچمه يه ده حاضيرليق آپارير.

بونلارى دوشونوركن فارس شوونيزمى نين گلن گونلرده قوْندارما ائرمنى سوْى قيريم قونوسوندا نئجه داورانديغى ، ميللى حركتين يئنى توتوملارينا ندن اولاجاقدير.