اسکی تورکلر، ایلی باهاردان باهارا سایارمیشلار. اونلار اؤز یاشلارینی گؤردوکلری باهارلارین تعدادینا باغلاییب، مثلن «من 40 باهار گؤرموشم» دئیرمیشلر. ائله ابرو گوندش‌ین ده بیر ماهنی‌سیندا دا «کیم بیلیر کاچینجی باهارداییم» ایفاده‌سینه توش گلیریک.

اسکی تورکلر، ایلی اوتلارین یاشیللاشماسی، یاشارماسی ایله باشلارمیشلار. اونلار یاشادیقلاری ایللری سایاندا «من 40 یاشیللاشما گؤرموشم» و «من 40 یاشارما گؤرموشم» دئیرمیشلر. بوگون عؤمور معناسیندا قوللاندیغیمیز «یاش» سؤزو ده یاشیللاشما، یاشارما فعللری ایله و همن اسکی اینانیشلا ایلگیلی اولاراق سؤیلنمیش بیر دئییم اولمالیدیر.

تورکجه‌ده بای و بَی سؤزلری وارلی و دولغون معناسیندادیر. باییندیر و باهادور سؤزلری وارلی آدام دئمکدیر. هر ایلین باشیندا، طبیعتین وارلی‌لاشیب دولغونلاشدیغی و اینسان اوغلونون یاشا دولدوغو آیلاری بایار/باهار آدلاندیریب و اونون ترسی اولاراق طبیعتین یاشیل یارپاقلاردان و اوتلاردان بوشالیب یوخسوللاشدیغی آیلارا باییز/پاییز دئمیشدیلر.

تقریبا 1500 ایل بوندان اولکی تورکجه‌نین «ذ» فونئمی سونرالار «ی» سینه چئوریلمیشدیر، بذرم= بایرام، بذک= بؤیوک، کلمه‌لرینده اولدوغو کیمی آذاق کلمه‌سی ده آیاق شکلینه دوشموشدور. اسکی تورکلر طرفیندن یای‌ی‌ی و یاژژژ آراسیندا تلفظ ائدیب «یاذ» شکلینده قلمه آلدیقلاری سؤز ایندی یاز و یای سؤزلرینه بؤلونوبدور. یاذ سؤزو چکیلمیش، اوزانمیش و یاییلمیش آنلامیندا اولاراق، یای (کمان)، یایغین، یایماق کیمی سؤزلرین باشیندا دورور. یاز و یای سؤزلری چکیلیب اوزانمیش گونلر و آیلار دئمکدیر.