سورقو: پان ایرانیست محفللری نین آذربایجان ملی حرکتی ایله دوشمنلیک ائتدیگینی و اونلارین فارس مدنیت راسیستلیگی سیاست ایجابی اولاراق آذربایجان تورپاقلارینی قونشو خالقلارین مالی گؤستردیکلرینه دقت چکیرسینیز. سیزجه آذربایجان ملی حرکتی نین چیخیش یولو نه-دیر؟

جاواب: چیخیش یول خالقا مسئله نی باشا سالماق، پان ایرانیستلیگه و فارس مدنیت راسیستلیگینه یئم اولموش تورکلری اؤز ملی منلیک و کیملیکلری نین خدمتینه قایتارماق اوچون آیدینلیق ایشلری آپارماق و اؤز ملی منلیک و کیملیکلرینی فارسلیق ایله ایضاح ائتمکدن واز کئچمک ایستمگنلری آذربایجان تورکلوگونده بیلینجلی و شعورولو بیچیم و شکیلده تجریده اوغراتماق اذربایجان آیدینلاری و آذربایجان ملی حرکتی نین چیخیش یولو ساییلار. دوشمن بالتاسینا ساپ اولموشلار زامانیندا بالتا اولاراق ملتین باشینی ازمک اوچون داها دا خطرلی و کدرلی اولارلار. دئمک، "ایت هورر، کاروان کئچر" آنلاییشی آتا سؤزلریندن بیری اولماسینا باخمایاراق اسکیمیش و زامانیمیزین اجتماعی و سیاسی مسئله لرینه جاواب وئره جک بیر آنلاییش گؤرونمز. پان ایرانیستلیگه و فارس مدنیت راسیستلیگینه یئم اولموش تورک کؤکنلیلر؛ او جومله-دن حجت کلاشیلر، افشین جعفریلر، مصطفی بادکوبه ای لر و داوود دشتبانلار، داریوش پیرنیاکانلار، سیدجواد طباطباییلر آذربایجان تورکلوگو اوچون زهر ماهیتی داشییارلار. بو زهرلری خنثی ائتمه نین ده یولو خالقی معاریفلندیرمکدن و بو مسئله نی دقت مرکزینده ساخلاماقدان کئچر.