ـ انورساداتین قاتیلی، محکمه‌نین حاکیمینه اونو سئکولار اولدوغو اۆچون اؤلدوردویونو سؤیله‌دیکده، حاکیم: سئکولار نه‌دیر بیلیرسن سوروشدوغوندا قاتیل دئمیشدی: یوخ بیلمه‌ییرم.

ـ نجیب محفوظ‌ون(میصرلی نوبئل اؤدولونو قازانان یازیچی) باشاریسیز تورچوسوندان، بو ایشینین نه‌دنی سورولدوغوندا، تورچو دئییر: یازدیقلاری کیتابلار اۆچون، اؤزه‌للیکله ده،" بیزیم محلله‌نین اوشاقلاری" کیتابینا گؤره
قاضی او کیتابی اوخویوبسان سوردوغوندا، تورچو دئییر:یوخ اوخومامیشام

ـ فرج فوده(میصرلی یازیچی و شاعیرین) قاتیلیندن اونو نه‌دن اؤلدوردون دئیه، حاکیم سوردوغوندا قاتیل دئییر: او کافیر و دینسیز بیریسی‌ایدی، قاضی بو سونوجا هاردان چاتدین دئیه سورور و قاتیل، اونون یازدیغی کیتابلاردان، قاضی یئنی‌دن سورور کیتابلارینی اوخویوبسان می؟ قاتیل دئییر: یوخ منیم کؤکوندن ساوادیم یوخدور.

بو اؤرنکلری گتیرمکدن آماج جهالتین و بیلمه‌مزلیگی‌نین گۆجونو گؤسترمک‌دیر.
ایران فوتبال ایستادییوملاریندا تۆرکلره قارشی چیرکین شعارلار وئرن آزینلیق دا، ائله بو جور جهالتین قوربانلاری‌دیرلار.
او چیرکین سؤزلری تیکرارلایان گنج‌لر فاشیستین میندار آماج‌لارینین قوربانلاری اولاراق، نیفرت توخوملاری‌نین چوخالماسینا یاردیم ائده‌رک "تۆرکون تۆرکدن باشقا دوستو یوخ" قاورامینین(مفهومونون) تمثیلچی‌لری‌دیرلر.
تهران، رشت و.... ایستادییوملاردا باغیران گنج‌لر فوتبال اۆچون بوغازلارینی ییرتاراق، تیم‌لری‌نین هر بیر خال الدن وئرمه‌گی‌ایله اۆزولورلر آنجاق بیز تۆرکلر چتین گۆنلرین اینسانلاری اولاراق فوتبالا بیر نسنه(ابزار) کیمی میللتیمیزین اویانیشینا، میللت‌لشمه پروسه‌میزی ایره‌لی سۆردورمه‌گه و نهایی قازانج اۆچون باخیب و بونلارین اوغروندا باغیریریق.
ایللر بویو دیلیمیزی ـ وارلیغیمیزی، کیملیگیمیزی تاپدالایان اؤلکه‌نین دمیر اؤدول‌لریله ایشیمیز اولمادان وطن سئوگیسی‌ و دَیَرلی اؤدول‌لر بیزیم اولور.
آنجاق ائله اونلارین باغیرتی‌لاری، سؤگوش‌لری‌له،توهین‌ـ‌تحقیرلری یاتمیش خالقیمیزلا، سیزلری هله‌ ده اؤزونه وطنداش سانان تۆرکلره اصیل اۆزونوزله، جهالت‌له فاشیست قوللوقچوسو اولدوغونوزو اۆزه چیخارداراق میللی حرکتین، حقانیتینی بللی ائدیر.
و بیر سؤزو اونوتمایین کی بیز تیراختوروموزلا هر ایل شامپییون اولوروق و اؤدول‌لر قازانیریق:

ایلک ایللر اؤز میللتیمیزه سیزین چیرکین اۆزونوزو تانیتماق و بیرلیک بایراغیمیز آلتیندا توپلانیب بیر یوموروق کیمی اؤز تیمیمیزی سئومکله، شؤونیزمله فاشیستین آذربایجان شهرلرینده تفرقه سالماق پیلانینی محو ائدیب بیرلیک اؤدولونو قازاندیق
ـ کئچن ایللر قاشقای قارداشلاریمیزلا، خلج‌لرله، خوراسان تۆرکلری‌له بیرلشمک اؤدولونو قازاناراق
بو ایل ده تۆرکمن قارداشلاریمیزلا یاخینلاشیب، قارداشلیغیمیزی بیلدیریب، اونلارا دا "تۆرکون تۆرکدن باشقا دوستو یوخدور" سؤزونو چاتدیراراق، بیر اولماق اؤدولونو قازاندیق.

بو اؤدول‌لر بیزلره یئتدیگی حالدا
سیزلر هله ده باغیرین ـ های کۆی سالین، سئودیگینیز قدر گؤینلتی‌دن یامان‌ـ‌سؤگوش وئرین، بیز ده اوزاق دۆشن قارداشلاریمیزلا بیرلشمک ماهنی‌لارینی سسلندیره‌رک، تکجه سیزلره گۆلوب، قازانج‌لاریمیزا اؤیونوروک.
یازی‌نین سونوندا ایلک گتیردیکلریم اؤرنکلره دایاناراق سؤگوش وئرن‌لره سسله‌نیرم، اؤنجه تۆرکلری تانییین سونرا آغیزلارینیزی چیرکین سؤزلرله بزه‌یین، بلکه جهالت و فاشیست قوللوقچولوغوندان ال چکیب اینسانلیق اۆچون بیر آددیم گؤتوردونوز دا، البتته بلکه دا......