غریبه گئجه‌دیر...

ایندی‌لیک "۲۱آذرین" سونونجو چاغلاریدی سئوگیلیم، کیم بیلیر آددیم آتیب کئچدییم بو خیاوانلارین کؤکسونده نئچه اینسان قانا بویانیب، الله بیلیر بو کوچه‌لرین دیزینه نئچه اینسان باش قویوب اؤزگورلوک یاسینی سیزلاییب. نئجه کؤرپه آتاسیز، نئچه باجی قارداش‌سیز، نئچه آنا،بالاسیز قالدیغینی بیلیرسن‌می هئچ سئوگیلیم؟

بو خزل‌ قاتارلاری‌نین اوزینده نئچه اینسانین املیک قوزو کیمی باشی کسیلیب بیلیرسن‌می هئچ؟ نئچه قیز سئوگیلی‌سی‌نین یاسیندا سسی‌نی یئل‌لری‌نین هارایینا قوشوب یا پاییز بولودلارینی اغلاماق یاساقلیغینا اؤرپک ائدیب؟

غریبه گئجه‌دیر سئوگیلیم، ائله بیر گئجه‌کی شاعیر اولدوغونا کوفورلر ائده بیلرسن، داها شاعیر اولمایاجاغینا اولومونه قدر تانری‌یا یالوارا بیلرسن، ائله گئجه‌کی داها پاییزین گلمه‌مه‌سینی آرزی ائده بیلرسن یا یاتیب سحره چیخمایاجاغینی...

غریبه گئجه‌دیر مله‌ییم، ایندی سنه یازدیغیم بو اورمودا هله‌ده گلن-گئدن سسی‌ وار، سونراسی آتش، آردیجا ایندی‌ده خزل‌لرین اوستونه قان جالانیر. بو کابوسون آردی یوخ دئیه ایناندیرارسان‌می منی سئوگیلیم؟

غریبه گئجه‌دیر ارک‌سیز، گولوستان باغی‌سیز اورمو دا قاداسی، "آزاد وطن"-ی آسیلان اورمو، یوسیف صابونچی‌سی گولله‌لنن اورمو، تاریخ بویو سس-سیز سمیر سیز تالانیب، قانین‌دا اوزن اورمو قاداسی...

آه...
داها نه دئیه‌جه‌ییمی خاطیرلامیرام،
اورمو دا یئل اسیر،
اوردا نه خبر؟