ارمنستان دؤولتی کیمی بیر دوشمنین واراولماسی نعمتدیر. چونکو کئچن اوتوز ایلده، بو دؤولتین ایدئولوژیک آددیملاری تورکییه- آذربایجان بیرلیگینه سبب اولموشدور.

تورکییه خاریجی سیاستینده، همه‌شه‌لیک دوست یا دوشمن یوخدور. اونلارین یگانه دوستو او اؤلکه‌نین قازانجیدیر و بو آلقیشا لاییق سیاستدیر. ائله بو آچیدان باخدیقدا، تورکییه‌نین قاراباغ قونوسوندا توتدوغو سیاستلرینه گوونمک اولمازدی. او دؤولت هر لحظه ارمنستاندان الده ائده‌بیله‌جک احتیمالی قازانجلارا گؤره، طرفسیز مؤوقع توتوب ایکی اؤلکه‌نی باریشا چاغیرابیلردی. چونکو آذربایجان- ارمنستان سینیرلاری آچیق اولدوغو حالدا، خزر انرژیسی راحاتجاسینا تورکییه‌یه داشیناجاقدی.

بئله بیر دورومدا ارمنستان دؤولتی تورکییه علیه‌ینه، ائرمنی سوی‌قیریمی ایددعاسینی اورتایا قویماقلا، تورکییه- ارمنستان ایلگیلرینه سون قویوب تورکییه‌نی آذربایجان آرخاسیندا دورماغا ایته‌له‌دی. بونا گؤره، 24 آوریل بیزله تورکییه‌نی بیرلشدیرن گون کیمی قیمتلنمه‌لیدیر و هرنه‌یی اؤز قازانجیمیز آچیسیندان باخماق و باشقا اؤلکه‌نین دردلرینی اؤز ایچیمیزه گتیرمه‌مک گونو.