مین ایللر هاواسینین، سویونون، دادینین، یان-یؤره‌سینین بول بهره‌سی ایله قیدالاندیغیمیز، آنامیزین سودو ایله جانیمیزا یوغرولان تورکلوک روحو کیمی اورمو گؤلو بو گون گؤز یاشلاریمیزین دامجیلارینا حسرت، بیر سوسوز کیمی کین دالین‌دا بئجردییمیز قؤنچه‌نین گئجه شئهینی گؤزله‌مکده‌دیر. آغزیمیزی کیمسه‌لرین سؤزلری ایله آچیب-یومدوقجا، قولاقلاریمیزی اؤزگه‌لرین پاسی توتدوقجا، قاپیلارا دوشوب دیله‌نه‌رک «سنه سو ایستییریک ای سئودانین صبیر داشی، هاچان دوز اولوب خور باخان گؤزلره ساورولاجاقسان. ایچیمیزده قوپان فیرتینام اؤزگورلویون یوللارینا بیر دان یئلی تک اسدیرچکسه‌ن»، - دئیه فیکیرلشمکدییک.

۲۰۱۱ ~جی ایلده مجلیس بیر سئوگیلینین، بیر عشقین اؤلومونه فرمان ایمضالارکن، من بیلیرم سن هئچ آجیمادان، سوسوز، جاددار-جادار اولموش دوداقلارملا گولومسدین و بیزیم نه قدر ضعیف و دوشونجه‌میزین نه قدر بسیت اولدوغونو اؤز بؤیوکلویونله آنلاتماغا باشلادین. زیرا بو یوردون قهره‌مانلاری اؤلومو قوجاقلارکه‌ن بئله آلچالمامیشلار. اونلار کیمسه‌نین قارشیسینددا کیمسه‌دن نسه اوممادان قیزیل اؤلومو بئله ترچیه ائتمیشلر. من امینم کی، سن سئودانین ائلچی‌سی‌سه‌ن. گلجیین چیرپان اوریی اولسان بئله، دوز سؤنمه‌سی اولوب بوتون سئومه‌یه‌نلرینه قیصاص ائد‌جک‌سه‌ن. سنین اینیلتین بیزیم آغزیمیزدان‌دیر، سنین سانجین بیزیم روحوموزدادیر، بیزلری کؤچورتمه‌یه مجبور ائتسه‌لر ده، یئنه ده ایبراهیمین ایسمایی‌لی کیمی عشقین قاپی‌سین‌دا اؤلومو سئوه‌رک‌دن گؤزله‌ییب سنین وارلیغیم ساغلاماق اوچون حاضیریق. بیزلر، بو یوردون اوشاقلاری آرازم گلمه‌سینی گؤزله‌مه‌دن آنالارلا بیرگه آغی دئییر کی، گؤز یاشلاریمیزلا سنی دول‌دوراق. اطرافین‌دا فیدان‌چیلیق اکیب کؤلگه‌سین‌ده قورورلا ایلنک. سنی قورودوب ۱۵ میلیون بالانی باشقا دیارلارا سورگون ائد‌نلره جاواب اولاراق دئییریک کی، یئری گلسه، تانری‌دان سنین پاییم دیلیچییک. اللریمیزی گؤیلره قالدیراراق باشیمیزی دیک توتوب آلتای داغلارین‌دان، قارتال ساوالانم بوز قاریندان سنین آلیشان لبلرینه سو گتیرچییک. قوجامان سهندین گؤزو باخا-باخا تبریزین دیلین قورتارسالار دا قوتسال و مقدس ساوالانم گؤزو قارشی‌سین‌دا موغانا، اردبیله دیوان توتول‌سا دا، آغری داغ‌دان اس‌ن کولکله سنی ایچیمیزه بسلیجییک، ائی سئودالی دنیز! ایچیمیزده آدینی آشیق‌لیک دفترینه یازاراق اوغرون‌دا داغلار چاپاجاغیق. قورخما، آرال گؤلونون آلین یازی‌سینی سنه چکدیرمیچییک تورکوستانی چؤللش‌دیرمه و اورانی ویرانه‌یه چئویرمه‌یه آند ایچ‌ن روس ایمپئرییاسی واختی ایله دونیانین دؤردونجو بؤیوک گؤلو اولان اؤزبکیستان-تورکمنیستان آراسین‌دا واقع اولموش گؤزل آرالی سوسدوروب اؤلومه محکوم ائتسه‌لر ده، سن بیل کی، بیز سنی آرازلا بیرلشدیریب خزردن ایزین آلاراق سنی یاشاداجاغیق. بیزلری ساتین آلیب کؤچورتمه ایسته‌یه‌نلر سنین دوز فیرتینانا راست گله‌جک. اونلار بیر سئودانین نه اولدوغونو، بیر آنانین «بالام هی»، - هارایینی نه آنلار کی، ایندی آنا آذربایجانسنین خسته جانینا ماهنیلار قوشوب آغیلار بسته‌له‌یه‌رک گئجگوندوز بوتون وار گوجو ایله هایقیراراق آغلاماق‌دادیر. گؤز یاشلاریمیز سئل اولماق‌دادیر. بیر آز دؤزوم‌لو اول، ائی منیم ارکؤیون، سئودالی دنیزیم. کیم بیلیر، بلکه، سن اوزاقلارا، لاپ اوزاقلارا اولان بیر اؤزگورلوک سئوداسیسان. یاشا، اورمولو گؤلو!