او زونوزی دیر! محمدرضا زونوزی. او «آتاتورک» دگیل، او «محمدامین رسولزاده» دگیل، او «میرجعفر پیشه‌وری» دگیل، او «ابوالفضل ائلچی‌بیگ» دگیل.

او زونوزون و آذربایجانین، ایرانین ایندیکی دوروموندا، أن بؤیوک سرمایه‌چی‌لریندن دیر. او آذربایجانیمیزین دگرلی ایش‌یارادان‌لاریندان، و اقتصادی انسان‌لاریندان دیر. او سنین و منیم قدر اولماسا دا، آذربایجانی، تورک دیلینی، تورک‌لرین میللی تیمی اولان تراختورو، و... سئویر و ایرانین بوروشوق و ایشلوسیز بوروکراسی‌سینده حقوقی باخیمدان یییه‌لندیگی تراختور فوتبال تاخیمی‌نین اوجالماغینی و یوکسلمه‌گینی دوشونور و البته کی او تراختورو دوشوندوکده، اونون ایرانین اوستون لیگ‌ینده، آسیادا و دونیادا قایرامان (قهرمان) اولدوغونو ایستیر و بو یؤنده بیر سیرا شعارلاری کی ایرانین سییاستمدارلاری طرفیندن سییاسی باغیمسیزلیق (استقلال‌طلبی) ایسته‌یی ساییلیر تراختورون یوکسلمه‌گینه و لیگ‌ده قالماغینا ضررلی بیلیر.

بللی کی «یاشاسین آذربایجان»، «یاشاسین تورک دیلی»، «اؤز دیلینده مدرسه، اولمالی‌ دیر هرکسه»، «تورک دیلینده مدرسه»، «یاشاسین تورکمن»، «یاشاسین قاشقای»، «تراختورو ائل ایستر، تورک میللتی دیل ایستر»، «تراختورو ائل ایستر، شرفلی میللت ایستر»، «آذربایجان یوردوموز، تراختور بَذقوردوموز (بوزقوردوموز)»، «آذربایجان اویاق دیر، کیملیگینه دایاق دیر»، «ائل آغاجی دوغراندی، آذربایجان تالاندی»، «معدن‌لر اوغورلانیر، یوردوموز تالانلانیر»، «اورمو گؤلو جان وئریر، دوشمن اونون قتلینه فرمان وئریر» و...

کیمی شعارلار زنوزی‌لرین باخیشیندا «هنجارشکن شعارلار» اولا بیلمز و بو شعارلار مساله یاراتمیر، آنجاق، «استقلال» شعارلاری امنیتی شعارلار اولدوغونا گؤره سونوجدا تراختورون لیگ‌دن حذف اولماغینا ندن اولا بیلر و تورک میللتین‌ین بیرلیگی‌نی ده پوزا بیلر. بللی کی تراختورون قایرامانلیغی و دونیادا داها اوجا سسلی تریبون اولماغی بیزه اؤنملی دیر، آنجاق، بو وارلیق شعارلاری دا بیزه اؤنملی دیر. «زونوزی»یه «یورولما تورک کیشی» دئمیریکسه، أن آزی «ائوین ییخیلسین» دا دئمه‌یک و ایجازه وئرک تراختور داها یوکسلسین و حساسیت‌لری اونا قارشی چوخالتمایاق. تراختورو بیر تورک تریبونو کیمی قورویاق، و اونو بیر «بیرلیک» یارادان وارلیق کیمی قبول ائدک، و ایراندا تورکون سسی کیمی اونا سس وئرک، و چالیشاق حاشیه‌لردن اوزاق قالسین، و ایجازه وئرک اونون مالی ایسپانسئری و حقوقی یییه‌سی اولان زونوزی ده اؤز اقتصادی هدف‌لرینه چاتسین. تراختورو بوتون دردلریمیزه درمان بیلمزدن، اونو دا قورومایا چالیشاق! بئله دگیل می؟!