سون گونلرده «تراختور» باشگاهی‌نین مدیری سایین «مهندس زنوزی» نین بعضی خبر آژانسلاری ایله مصاحیبه‌سی و بو مصاحیبه‌ده «تراختور» طرفدارلارینین استادیوملاردا وئردیکلری بعضی ملّی و حق طلبانه شعارلاریندان ناراضیلیغینی بیلدیرمه‌سی بعضی دوستلار و تراختور طرفدارلارینی اینجیدیب و حتی بعضیلری مهندس زنوزینی تنقید ائتمه یه باشلامیشلار!

دوستلار! بیر آز انصافلی اولمالی و اؤزوموزو مهندس زنوزی‌نین یئرینه قویمالی و بو ساحه ده اونا اولان باسقی و فیشارلاری نظره آلاراق قضاوت ائتمه لییک! مهندس زنوزی اؤزنو بو باسقی و فیشارلاردان اوزاق ساخلاماغا او جمله‌لری دئمکدن باشقا چاره سی یوخدور؛ آمما طبیعی کی، بیزیم ملّتین‌ده تاپدالانمیش حاقلاری و حتی ارمنی قدری بو اؤلکه ده آنا دیلینده درس اوخوما حاقّی‌نین اولماما سسینی بو تریبوندان دونیایا یایمالییق، چونکو بیز بو حاق سسیمیزی ایراندا یایماغا باشقا تریبونوموز یوخدور.

آمما دقت ائتمه لییک کی، پانفارسلار، ایرانشهریلر، شاه پرستلر و بیر سؤزده ایرانین هئچ اولمازسا نفوسونون یوزده قیرخینی(%۴۰) تشکیل ائدن تورکلره یوز مین نفر ارمنی قدر حاق قائل اولمایانلار مهندس زنوزی‌نین سون مصاحیبه سیندن سوء استفاده ائده رک تراختور طرفدارلارینی اونون علیهینه یؤنلتمه‌یه اجازه وئرمه‌مه‌لییک.

تراختور طرفدارلاری موقعیتی درک ائده رک ورزشگاهلاردا حاق سسلرینی اؤلکه مسئوللارینین قولاقلارینا چاتدیریب دونیایا یایمالیدیرلار، بوندان باشقا بیر یولوموز یوخ، آما قویاق مهندس زنوزی اؤز ورزشی وظیفه سینی انجام وئرسین بیزده اؤز ملّی وظیفه میزی!