یاراشیقلی‌لیق، کاریزمالی‌لیق، ایگیدلیک، قایرامانلیق، نؤچه-کؤله‌ بئجرتمه، دیکتاتورلوق و موستبیدلیک سؤزلرینین آراسیندا بیر ایلگی وارمی سنجه؟

کاریزما جهاریسما (یونانی: χάρισμα؛ «خاریسما») دوغال چکیجی‌لیک و ائتگیلمه گوجو دیر کی «أردم» و «چکیجیلیک» آنلامینی داشییان یونانی «خاریتانس» سؤزوندن آلینیب. یاراشیقلی و کاریزمالی بیر اینساندا قورخمازلیق، اؤنجوللوک، اورکلی‌لیک و ... کیمی اؤزللیک‌لر (خصوصیت‌لر) اولسا، میللتین تاریخدن آلمیش «قایرامانلیق» اولقوسو ایله اوست-اوسته گلن «قایرامان» (قهرمان) دونونو گئییب، «قایرامان» اولار و میللتین اینانجینی أله گتیره‌ بیلسه، نؤچه-کؤله بئجرتمه سیستئمی ایله سؤزلرینه قولاق آسان و بویوروقلارینی دوشونمزدن گؤرن نؤچه-کؤله بئجردیب، توپلومون (جامعه‌نین) هامیسینا اؤز دوشوندویو قانون‌لاری یازیب، اؤز یازدیغی قانون‌لاری دیکتاتورلوق ایله گؤردورر! بئله بیر اینساندا نارسیسم اؤزللیک‌لری اولسا یازدیغی قانون‌لاری هر گون اؤز ایسته‌دیگی ایله دگیشر و سونوندا یازیلی قانون‌لار دا اورتادان یوخ اولوب، و دیکتاتور اؤزو «قانون» اولار و ایستیبداد مرحله‌سینه کئچیب، «موستبید» بیریسینه دؤنوشر. بئله بیر «موستبید» اینسانی دونیانین گوج‌لری چوخ راحات گؤزلمله‌ییب، یؤنلتیب، کونتورول ائده بیلرلر و اونو گؤزلمله‌مک ایله بوتون میللتی یؤنلترلر!

آنجاق، بونلارین هامیسینا ندن «میللت» دیر! موستبید بیر اینسانین یارانیشیندا میللت سوچلو دیر! کاریزمانی قبول ائدن و قایرامان آختاران توپلوم (جامعه) اؤز سوروملولوغونو (مسئولیتینی) قیراغا قویوب، بیر «قورتاریجی» گؤزله‌دیکده، سونوندا اؤزونو بیر «موستبید» اینسانین بویوروغو (فرمانی) آلتیندا بولار، و بو اورتامدان قورتولماق اوچون یئنه بیر یئنی قایرامان آختارار و ناغیل یئنی‌دن باشدان باشلانار!

چارا نه دیر؟! توپلومون اویه‌لری «قایرامان» آختارمازدان، اؤز سوروملولوقلارینی (مسئولیت‌لرینی) دوشونوب، باشقاسینا نؤچه-کؤله اولماقدان قورتولوب، حرکته کئچمه‌لی‌دیرلر و اؤز توپلام و بیرلشمیش بیرگه باخیشلارینی قانون ائدیب، دوغرو سئچیم و دئموقراسی یولو ایله اولوسون اولوسا حاکیم اولماغینی ساغلامالی دیرلار.
لوطفاً و لوطفاً «قایرامان» آختارمایاق!

لوطفاً و لوطفاً «دیکتاتور» بئجرتمه‌یک!

لوطفاً و لوطفاً «موستبید» یاراتمایاق!

لوطفاً و لوطفاً «بیرگه» چالیشاق و حرکت ائدک.

.