اؤز یاخینلاری/تانیش‌لاری اوچون بیر کیچیک آددیم گؤتورمه‌یندن «آذربایجان» و «تورک‌لر» اوچون بیر آددیم گؤتورمک گؤزلنیلمیر.

بیر یئی‌لیک اؤرگوتونون (خئیرییه تشکیلاتی/سازمانی) باشچی‌لاری اویماقین أن وارلی وکیل‌لریندن بیری‌نین بو گونه جان بیر قیران دا بو یئی‌لیک اؤرگوتونه یاردیم ائتمه‌مه‌گینی بیلدیکده، اوندان مالی یاردیم آلماق اوچون اؤزلریندن بیر نفری اونلا دانیشماغا گؤندردیلر.

یئی‌لیک باشچیسی: سایین وکیل! بیز سیزه گؤره آراشدیریب، سیزین مالی دورومونوزون یاخجی اولدوغونو باشا دوشموشوک، آنجاق، ندنسه بو گونه جان بیزیم اؤرگوته یاردیم ائتمه‌میسینیز.‌
‌
وکیل: بئله بیر آراشدیرمانیز وارسا حتماً آنامین اوچ ایل خسته‌لیکدن سونرا کئچن هفته اؤلدوگونو باشا دوشموسونوز. یازیق آنامین أمکلیک آیلیغی اونون خسته‌خانا هزینه‌لرینی اؤدمز ایدی.‌‌
‌
یئی‌لیک باشچیسی: بیلمیردیم! چوخ اوزولدوم. باشینیز ساغ اولسون.

وکیل: بو آراشدیرمالاردا منیم قارداشیمین ایکی قیچی دا ساواشدا ألدن گئدیب، ایللر دیر کی ائودن ائشیگه چیخانمیر و ۵ اوشاقلی بیر عائله‌نی کئچیندیرنمیر مسأله‌سینی ده باشا دوشمه‌لی ایدیز.

یئی‌لیک باشچیسی: وااای... نه بؤیوک فلاکت.‌
‌
وکیل: آراشدیرمالارینیزدا باجیما گؤره ده بیلگی توپلایا بیلدینیز می؟ او ایللر بویو دیر بیر پئسیخولوژی خسته‌‌خاناسیندا یاتیب، و بیمه اولمادیغینا گؤره خسته‌خانا هزینه‌لرینی اؤده‌یه بیلمیر.‌
‌
یئی‌لیک باشچیسی (چوخ اوزوجو بیر دورومدا): منی باغیشلایین. بیلمیردم بو قدر فلاکتله اوغراشیرسینیز.‌
‌
وکیل: ایندی کی من أن یاخین عزیزلریمه بیر قیران دا خرجله‌مه‌میشم، مندن نئجه سیزین یئی‌لیک اؤرگوتونوزه خرجلمه‌ییمی گؤزله‌ییرسینیز؟!!!‌
‌
گون سؤزو: ألدن گئدن گئتسین! یالوارمایا بولانمیش هئچ بیر زادی ایسته‌میرم: حتی یاشامی دا! (ارنئستو چئگوارا)

آچیقلاما: اؤز یاخینلاری/تانیش‌لاری اوچون بیر کیچیک آددیم گؤتورمه‌یندن «آذربایجان» و «تورک‌لر» اوچون بیر آددیم گؤتورمک گؤزلنیلمیر. هله اؤز یاخینلارینا/تانیشلارینا مالی-معنوی ضربه ووراندان اصلا و ابدا!