رحمتلیک مهندس غلامرضا امانی‌نین توی شنلیگینده امنیتی قوه‌لر تالاردا ییغیشیب بیر یاندا اوتورموشدولار و اؤز حسابلاری ایله مراسیمی کنترل ائدیردیلر...

مهندس امانی میکروفون دالیندا قوناق‌لارا خوش گلدین مئساژینی دئدیک‌دن سونرا بئش اون دقیقه‌لیک‌ده آزربایجان‌دا کی موختلیف تبعیضات اوچون‌ دانیشیق‌لارآپاردی.

بو دانیشیق‌لار آراسی اوزونو شخصی گئییم‌ده اورداکی امنیتی نیرولارا توتارکن دئدی: تبعیضات تکجه دیل، کولتور، ایقتیصاد و ... دئییل حتی بیزیم دؤولت خادیم‌لریمیز و بوجور امنیتی نیرولاریمیزدا مرکزه نیسبت تبعیض آلتیندادیلار، همی پست و مقام تبعیضاتی همی‌ده حقوق بابتین‌دن تبعیضده‌دیلر! بو دانیشیق آرایا گلن زامان همان امنیتی نیرولار سانکی دردلریندن سؤز آچیلمیشدی!

ایل‌لر بویودور بو قضیه‌نین اوستوندن کئچیب
دونن آخشام تبریز بازاری یاندی...

آتش‌نیشان‌لار ایفطارلارینی سو ماشین‌لاری‌نین سویو ایله آچدیلارسا، اوباشدانلیق‌لارینیدا خسته خانادا یاتدیق‌لاری تخت اوستونده یئییب ایچدیلر!

تبریزین چوروک موروک آتش نیشانی ایمکاناتی ایله اولسادا زنگین تاریخ‌لی اوستو اؤرتولو بازارینی اوت فیرتینالاری‌نین آرتیق خیسارت‌لریندن قورودولار...

قول‌لارینا ساغلیق!
آنجاق...،
مرکز رسانه‌لرینده امن آمانلیق‌دیر!
نه تبریزین اوستو اؤرتولو بازاری یانیب نه‌ده آتش‌نیشان‌لارین چکدیک‌لری زحمت و یارالاریندان بیر خبر وار...
بورادا تبعیضات هر شئی‌دن بول گؤرونور!

آما بیریسی دئمیشکن لیوانین دولو طرفیندن‌ده گؤره‌ک‌دا نولار...

دولو طرفینه باخدیق‌دان سونرا سو گؤرمدیم یالنیز بیر باتمان دوز گؤردوم...
حاضیرلانیب یارالاریمزا سپیلسین!
سس سالمایین! هئچ بیلمه‌سین‌لر تبریز بازاری یانیب.
صاباح تیتر وورارلار «آتش آمد، تماشاگران را خاکستر کرد»...!!!