گونئی ماحالینین صوفیان شهری و صوفیان چایی، اورمو سومای بؤلگه‌سینین صوفیان کندی و صوفیان چایی و هابئله ماراغانین صوفی چایی آدلارینی آراشدیرماق بو قیسا یازی‌نین مقصدیدیر.

آذربایجاندا چوخلو کند، داغ، دره و چای سو سؤزو ایله ایگیلیدیر. اهر و مئشکینده سووارا کندی، مئشکین و ماکیدا قره‌سو چایی، ماکیدا ساری‌سو و کیرلی‌سو چایلاری، زنگاندا سوجاس و سوها کندلری، سوجاس و میرجانسو چایلاری و سولودره داغی، خویدا سوسوزداغ و گیلاندی‌سو چایی، سایین‌قالادا هولاسو و هاچاسو کندلری و هاچاسو چایی، هئشتریده سولوداغ، سولوق کندی، شورسو و درین‌سو چایلاری، سالماسدا دلی‌سو، دره‌لی‌سو، درین‌سو و دوشیوان‌سو چایلاری، همداندا سوباشی کندی، اورمودا سولوق شلاله‌سی، دندی‌ده سولان‌داغی، بیجاردا سوکندی، موغاندا جین‌سو چایی و تاریمدا برسو کندی بو لوغتله ایلگیلی اولان یئر آدلاریندان نمونه‌لردیرلر.

هله اورمو، ماراغا، مییانا، هئشتری و سراب شهرلرینده سوما آدلی کند و چایلاردا واردیر و اومودا سوماچایی آخان منطقه‌یه سومای بؤلگه‌سی ده دئییلیبدیر.

سو سؤزونون قدیم فورماسی «سوب» اولموشدور. سوب سونرالار «سوﭪ» و داها سونرالار «سوو» شکلینه چئوریلیمیشدیر. چوخ یئرلرین شفاهی دیلینده هله ده سوو دئییلسه ده ، یازیلی دیلیمیزده واو حرفی دوشرک بو سؤز «سو» شکلینه دؤنوبدور. دیوان الغات الترک ده سو سؤزونو سوﭪ ثبت ائدیب ( ص 495)، اونولا ایلگیلی سوﭬلاق، سوﭬسادی، سوﭬساتدی، سوﭬلاتدی، سوﭬلاندی، آتی سوﭬغاردی، سیرکه سوﭬسیدی کیمی اؤرنکلر ده وئریبدی.

زنگین کولتورموزون محوینه قصدائدن تحریفچی‌لر، سوﭪ لوغتینی صوف شکلینده یازاراق بو آدلاری صوفی‌لیک و تصوف فرقه‌لرینه باغلاماق ایسته‌میشلر. بیر حالدا کی بو آدلار سو سؤزونون قدیم فورماسی اولان سوﭪ ایله ایلگیلی یارانمیشلار.