ساهاتدا یوز کیلومئتیر خیز و سورَت ایله توولو یول گئدن بیر آرابا ایچینده گیلیوی (عائله‌وی)، و اؤزووو سوروجو اولاراق و یولون ایکی یانی‌نین دره اولدوغونو و أن کیچیک یانلیشلیقلا دره‌یه دوشه بیله‌جه‌یینیزی سان! یولون اورتاسیندا بیر بالاجا حئیوانا (ایت، پیشیک، تاوشان، تولکو، و ...) راستلاشماغیندا نه ائدرسن؟ بالاجا ناز حئیوانی ازیب، کئچرسن‌می یوخسا یؤنلمه‌چرغینی (تیرَکله‌جه‌نی، فرمانی) ساغا-سولا دؤندررسن؟‌

‌گیلین ایله بیرلیکده چؤلون اورتاسیندا بیر نئچه ناموس باشا دوشمه‌ین لات اینسانا / بیر نئچه ییرتیجی حئیوانا راستلاشدیغیندا، اونلارین آتماجالارینا و دیش قیجیرتمالارینا قارشی نه ائدرسن؟ اونلار ایله ساواشارسان می یوخسا چالیشارسان ساواشمازدان اونلاری سوواسان؟

گیلین ایله بیرلیکده ألینده توپانجا اولان بیر انسانا راستلاشدیقدا اونو یامانلاییب، سؤیوب، اونا داش آتارسان می یوخسا او آدامی و توپانجانین گولله‌لرینی سووماق، و گیلیوی قوروماق اوچون بیر منطقی یول آختارارسان؟

گیلین ایله بیرلیکده داغچیلیقدا بیر بؤیوک و یئکه قایا داشین سیزه دوغرو گلدیگینی گؤردوکده اؤزونوزو قیراغا چکمک اوچون بیر منطیقه سیغان یول تاپارسان می یوخسا داشین قارشیسینا کئچیب، اؤزووو و عائله‌وی تهلوکه‌یه سالماق ایله اونو دایاندیرماغا چالیشارسان؟

دؤرد نفرلیک گیلین ایله بیرلیکده بیر قویویا دوشن آن، اوچ نفری ساخلایا بیلن، و دؤرد نفر اولسا قیریلاجاغینی بیلدیگین بیر ایپدن ساللاندیقدا و چاراسیز بیر دورومدا اؤزووو یا عائله‌ندن بیر نفری قوربان ائدرسن می یوخسا، دؤرد نفرلیک او ایپدن آسلاق قالیب، و نهایت هر دؤردونوزون درین قویویا دوشمه تهلوکه‌سینین سورملولوغونو بوینووا آلارسان؟

چوخلو بئله اؤرنک‌لرده سن تصمیم توتان و سئچن انسان اولسان، منطیق ایله اؤنله‌یرسن می یوخسا دویغو ایله؟

اولوسووو دوشون و اولووسووا قارشی اولان دوشمن‌لری، خطرلری، تهدیدلری، تهلوکه‌لری، و ... «دویغو»، «عاطفه»، «کؤورکلیک»، و ... ایله اولوسووو خطره سالارسان می یوخسا اؤزووون قوربانی و فدا اولماغیوین ائحتیمالینی دا بیله-بیله اولوسووو قورومایا بیر منطیقه سیغان یول آختارمایا، و أن آز هزینه ایله قورتولماغینیزا چالیشارسان؟

البته کی دویغونو دا، منطیقی ده، هر ایکیسینی ده یئترینجه ایقناع ائدن و راضی ساخلایان بیر تصمیم توتوب، سئچمک اولسا گؤزل اولار! آنجاق، سییاست مئیدانی «عاطفه» و «دویغو» مئیدانی دگیل! دیلده دویغوسال سؤزلر دئسک ده، عملده آجی سئچیملره مجبور قالاریق!