ارمنی باش ناظر پاشینیان شوشادا یاللی گئدیب. اوسته‌لیک، بیر آز ایچیب، بئینی حال‌لی گئدیب.

تمام، موسیقی، صنعت بشریدیر، هامینیندیر: هامی بونو دینله‌یه، سئوه، رقص ائده بیلر. اما مسئله ارمنیلرین منیمسه‌مه آلیشقانلیغینین آرتماسیندا و بیزیم بعضی موسیقی شوناس عالیملرین بونا مات وضعیتین‌ده باخماسیندادیر.

ضیالیلار اؤزونو اؤلدورور کی، نینکی پاشینیانین اوستونده گزدیی او تورپاق - شوشا، حتی رقص ائتدیی او موسیقی - یاللی دا بیزیم‌دیر. یاللینین اونلارلا نؤعو وار، بو دا اونلاردان بیری.

اما بیز نینکی شوشانین، هئچ یاللینین بئله بیزیم اولدوغونو ثبوت ائده بیلمیریک. نیه ائده بیلمیریک؟ چونکی بونو ثبوت ائد‌جک عایدیاتی قوروملارین امکداشلاری، معلملری یاتیب. بونلاری خالقین مدنی ثروتی، میللی غرورو ماراقلاندیرمیر. معاش آلماق اوچون اوتوروبلار اوردا، آیین سونونو گؤزلییرلر (اوخو: آذربایجان مدنیتینین، اینجه صنعتینین سونونو گؤزلییرلر).

بئله معلملری اولان خالقا دوشمن لازیم دئییل کی!

هئچمی بونلارین ایچی سیزلامیر، هئچمی ناراحات اولمورلار؟

گؤرونور، اولمورلار. قویاسان، آنجاق تویدا ائششک سودان گلینجه‌یه قدر ایچیب یال‌لی گئتسینلر. ایشلری-گوجلری درس پروگرامینی طلبه‌لره ازبرلتدیریب، معاش گودمکدیر. ضیالی تعصبکش‌لیکلری یوخ‌دور. پالتاریویان ماشین کیمی بیر شئیدیرلر.

من‌دن سوروشسانیز، دئیره‌م کی، بئله معلملرین پاشینیانلا قول-بویون اولوب یال‌لی گئدن آداملاردان هئچ بیر فرقی یوخدور. من او معلملریمیزی پاشینیانین یال‌لی دایره‌سینین ایچینده، اونونلا قول-بویون گؤردوم.

ژورنالیست اولاراق زنگ ائدیریک مدنیت و اینجه صنعت اونیورسیتتینه، بیر نفر بیزه آچیقلامیر کی، بس، قارداش، بو یاللی بیزیم یاللیلاردان فیلان یال‌لیدیر! هئچ بیرینین واختی یوخدور - گویا. اصلینده ایسه واختلاری وار، ساده‌جه، ساوادسیز، بیلگیسیزدیرلر، قانماز، کوتبییندیرلر.

حیاتی اهمیت داشییان ۱۵ ثانییه‌لیک موسیقینی دینله‌مه‌یه واخت آییرمایان، صاحب چیخمایان عالی مکتبین موسیقی معلملرینین، بستکارلارین ۲۰ فایزلیک تورپاغا صاحب چیخماسینی گؤزله‌مک آبسورددور. بونلار یالنیز اؤز قارینلارینی گودورلر.

ائله بو ساوادسیزلارین اؤز قارینلارینی گوددوکلری‌دیر کی، اولجه بالابان، سونرا دولما، سونرا اوزئییر بیین موسیقی‌سی، سونرا میرزئیی... داها سونرا ایروان، آغری، گومرو، زنگزور، مئغری، قافان، درلیز، گؤیچه، آماسیا، داغ بورچالی، داها سونرا داغلیق قاراباغ، آران قاراباغا ارمنیلر صاحب چیخدیلار.

هر شئی یال‌لی‌دان، دولمادان باشلاییب؛ هر شئی یال‌لی، دولما ایله داوام ائدیر... چونکی تورپاق ساواشی ایلک نؤوبه‌ده مدنیت، اینجه صنعت، تاریخ و اینفورماسییا ساحه‌سین‌ده گئدیر.

ارمنی‌دن شوشانی، قاراباغی، ایروانی آلماق اوچون بیرینجی یاللینی گئری آلماغی باجارمالیسان.

نه قدر کی بئله بستکارلارلاریمیز وار، نه قدر کی آوروپانی آمریکانین پایتختی سایان موغننیلریمیز وار، ائله شوشادا پاشینیان یاللی گئده‌جک.