وطن منه اوغول دئسه نه دردیم

مامیر اولوب قایاسیندا بیتردیم

روسییه‌نین فوتبال لیگی، تۆرکمن‌لرین سرداری‌نین تیمی‌، [سن‌پئتئرزبورگ‌ون زئنیت‌ینین] شامپییونلوغویلا باشا چاتدی.

سردار آزمون؛ تیم‌لری‌نین سون اویونوندا تۆرکمن‌لرین میللی پالتاری‌لا شامپییونلوق جامینی گؤیه قالدیراراراق چوخلارینی چوخ سؤزلری یئتیردی.

تاریخ بویو میللی قهرمانلار؛ اؤز میللتلرینه، غورور، اؤزگۆون و سئوینج باغیشلاماغا چالیشارلار و گَنج سردار بونلارین هامیسی‌نی بیر یئرده، آغری و آجی‌لار گؤرموش میللتینه باغیشلادی.

کاتالانلارا کاتالان بایراغینا بۆرونموش جام‌لارین گؤیلره قالخماسی تیکراری اولموشدورسا دا، آنجاق تۆرکمن‌لره مسعود خلیلی [ ایران‌ین آت چاپیزدیرما فئدراسییونون باشقانی]‌نین توهینلریندن [تۆرکمن‌لری یوخسول، آلیشقان«مؤعتاد»، و پیژامه گئین آدلاندیرمیشدی] سونرا، سردارین غورور وئریجی ایشی‌ مسعود خلیلی کیمی فاشیست‌لرین آغیزلارینی یومماقلا بیرگه، او گنجین میللتینه، کیملیگینه ـ میللی پالتارینا و وارلی کۆلتورونه اولان باغلی‌لیغینی گؤستردی[ علی دایی، کریم باقیری و.... چوخلو اؤزلرین ایتیرمیش تۆرکلرین ترسینه].

سردارین بو ایشی میللتینه، سئل‌ین خاسارلاری‌لا، آجی‌لارینی اونوتدورماقلا بیرگه، ایل‌لر بویو دین و دیل باخیمیندان ازیلن ائلینه تکجه بیر سؤزو یئتیردی؛ باشینی دیک توت "اولو تۆرکمن".

اونون بو ایشی چوخلارینا بؤیوک درسلر وئردی:

بلی سیز دۆز بویورورسونوز؛

تۆرکمن آلیشقان«موعتاد»‌دیر، آنجاق قازانماغا، کؤنوللری فتح‌ائتمگه آلیشقانلیغی وار.

تۆرکمن پیژامه‌پوش‌دور، آنجاق تاپا بیلسز ـ پولونوز یئتسه او گؤزل پیژامه‌لردن سیز ده آلین، گئیین‌ [میللی پالتارینیز وارسا گؤسترین]
اونلار یاغی عشیره‌دیرلر، بلی آتا‌ ـ‌ بابالاری یئر اۆزونو قیلینج‌دان کئچیردیب یاغمالاییب دؤولتلر‌له ایمپراطورلوقلار قورارکن، تۆرکمن آتلاری‌نین آیاغی آلتیندا ازیلمکدن قورخان، چوخ گۆوه‌نیب، اؤیوندویونوز آتالارینیز نم هارالاردا گیزلنیرمیشلر.

و من سردار کیمی ایگید تۆرکمن‌له سویداش و دیلداش اولدوغوما گؤره فخر ائدیرم، بیرلیکلری، تعصصوبلاری و باجاریقلاری‌لا دۆنیانی حئیران قویان بۆتون تۆرکمن‌لر کیمی،....