صفی الدین اورمولو (صفی الدین عبدالمؤمن بن ابی المفاخر یوسف بن فاخر اورمولو) ٦١٣ ه.ق ده اورمودا آنادان دوغولموش و ٨٠ یاشینداکن ٦٩٣ ه.ق ایلینده بغداد شهرینده دونیادان گؤز اؤرتموش دور.

صفی الدین اورمولو موسیقیچی، خوش خط یازار، ادیب، عروض اوستاسی و موسیقی ده "منتظمیه مکتبی"نین تمل داشینی قویان بیری دیر.

(منتظمیه مکتبی: systematist school)

عباسی لرین خلافتی زامانیندا یاشادیغینا گؤره موسیقی دونیاسینی چوخ بؤیوک حالدا ائتگی لندیرن ایکی کیتابینی "الأدوار فی الموسیقی" ایله "شرفیه" رساله لری عونوانیندا عربجه یازیر.

دئمک اولار الأدوار رساله سی موسیقی تئوریسی نین قونوسوندا دونیادا بیرینجی کیتاب ساییلیر.

عبدوالقادیر ماراغالی (عبد القادر غیبی مراغی) ایسه شاعیر ، موسیقیچی، خوشخط یازار، نقاش، قورآن حافیظی و عود سازینین چالقیچیسی ایمیش کی ٧٥٧ ه.ق ایلینده ماراغادا دونیایا گؤز آچیب و ٨٣٨ ه.ق ایلینده اوزبکیستانین سمرقند شهرینده دونیادان کؤچموش دور.

عبدوالقادیر ماراغالی نین لقبی ایکینجی اؤرگه دن (معلم ثانی) ایمیش.

اروپادا بیرینجی کره (دفعه) اولاراق "گیزئ وئتئر" (Gizze Wetter) آدلی آلمانلی بیر پروفئسور عبدوالقادیر ماراغالینی دونیا سويه سینده بیر موسیقی یوروملایان (موسیقی قونوسوندا باخیش صاحابی اولان) بیلیب دیر.

عبدوالقادیر ماراغالی "یاتوغان" (یانا یاتمیش آنلامیندا) آدلی بیر سازی یارادیب دونیایا تانیتدیرمیش دیر و او بیرینجی موسیقیچی اولاراق "موغام"لاردان سؤز آچمیش دیر.

موسیقی نوت لارینین یازیلیشی او دؤنم لرده ابجد حرف لری نین یاردیمی ایله اولورموش.

بوگونه دک چوخ چالیشیلیب دیر او نوت لاری اوخویوب او موسیقی لر یئنیدن ایفا ائدیلسین.

او چالیشمالارین ان اؤنملیسی "فرهاد فخر الدینی"نین تصنیفی دیر کی اونو "ایمام علی دیزیسی"نین (سئریالی نین) موسیقیسی اولاراق عبدولقادیر ماراغالی دان آلینمیش بیر موسیقی تئمی نین اساسیندا تنظیم ائتمیش دیر.

روح لاری سئوینجلی، یئرلری اوچماق (جنت) اولسون!