اسکی چاغ‌لاردان بری بؤیوک – بؤیوک فیلسوف‌لار، ساوچی‌لار، دوشونرلر اخلاق قونوسوندا اؤز باخیش‌لارینی بیزلره چاتدیرماغا چالیشیب‌لار. چاغیمیزدا فیزیک بیلیمی گونو-گوندن گلیشه‌رک بوتون قونولاردا ایره‌لی‌لمکده‌دیر. آرتیق، فیزیک بیلیمی ایره‌لی‌له‌دیکجه، فلسفه بیلیمی، میفیک باخیش‌لار حتی دینی گؤروش‌لر اؤزلرینی چوخلو قونولاردان قیراغا چکمک زوروندا گؤرورلر. آنجاق، بونلار بوتون قونولاردان گئری چکیلسه‌لر ده، اخلاق قونوسوندا هله ده اؤز قونوم‌لارینی ساخلاماقدادیرلار...

من اخلاق اوزمانی دئییلم. آنجاق، ایستر بیرئیسل یاشاییشیمیزدا ایسترسه توپلومسال یاشاییشیمیزدا اخلاقی دَیرلرین قورونمالی اولدوقلارینین گرکدییینه اینانیرام. منجه اخلاق، اینسانی یاشاییشین بینؤوره‌سی سایلیر. دئمک، بیز اخلاقسیزلیق‌لا اله گتیردیک‌لریمیزین آدینی قازانج قویا بیلمزیک.

اینانیرام بوگون‌لر قارشیلاشدیغیمیز آتیشمالارین، چکیش‌برکیش‌لرین، تخریب‌لرین چوخو اخلاقسیزلیغیمیزدان دوغور. یوخسا هامیمیز هامیمیزین بیر یولدا اولدوغوموزو دوشونسک، توتدوغوموز یولا گئرچکدن اینانساق، بو یولو یالنیز باشینا سونا چاتدیرا بیلمه‌دیییمیزی آنلاساق، دیله گتیردیییمیز آماج‌لارا اورکدن اینانساق، اخلاقسیزلیق‌لا اله گتیردیک‌لریمیزی قازانج آدلاندیرا بیلمه‌دیییمیزی بیلسک، ملتیمیزین اوغورونو اؤزوموزون بیرئیسل ماراق‌لاریمیزا اوستون توتساق، بو چکیش‌برکیش‌لرین یئرینی، بو آتیشمالارین یئرینی، بو تخریب‌لرین یئرینی ایش‌بیرلییی توتار. اوندا اورک‌لریمیزده بیربیریمیزه قارشی نیفرت بسله‌مک یئرینه، سئوگی ایله سایقی بسله‌یه‌ریک.

سون سؤز اولاراق زامانین لاپ بئله گئرچک سوزگئج اولدوغونو وورغولاماق ایسته‌یییرم. بیز سونسوز اولاراق هامینین باشینا بؤرک قویا بیلمزیک. ایستر ایسته‌مز بیر گون اوزوموزه چکدیییمیز یالانسی اؤرتورک‌لر قیراغا چکیلیب یاخود قیراغا چکدیریله‌جکلر. اوندا بیزیم گئرچک اوزوموز اوزه چیخاجاقدیر. او گونو اونوتمایاق...