دوغانین ال دَیمه‌میش قوینوندا تک باشیما اوتورموشام. آیاق‌لاریمین آلتیندا یام-یاشیل یاماج‌لار، باشیمین اوستونده آغ-آپباق بولودلار، گؤزلریمین اؤنونده یام-یاشیل یاماج‌لارین اورتاسیندا گونشین هله اریده بیلمه‌دییی قارلار، قارشیمدان منه یاخینلاشان بولود مو دئییم چن می دئییم... بوتون بونلار قوش‌لارین اوزاق‌لاردان بیر اینیلتی کیمی قولاق‌لاریما گلیب چاتان سس‌لری ایله بیرلیکده، بیر ده لاپ اوزاق‌لاردا آخان چایین اورادا-بورادا بوغولموش، شاققیلتیدان دوشموش سسی منی سانا گلمز بیر دینج‌لییه دالدیرماقدادیر...

یاییلمیش خبرلرده گؤره، دونن بو یاخین‌لاردا، لاپ ائله بو یاخین‌لاردا، سالدیرقان بیر قافلان بیر چوبانی دیدیب داغیتمیشدی. دیدیلمیش چوبانین شکیل‌لرینی دونن "چالوس جاداسی خبرلری" آدلی بیر تلگرام کانالیندا گؤرموشدوم. بونا گؤره ده بوگون داغا چیخیب چیخماماغیما ایکی اورکلی قالمیشدیم. سونوجدا چوخ اوزاق‌لارا گئتمه‌یه‌جه‌یم دئیه، اؤزومو راضیلاشدیرمیشدیم. آنجاق، نه‌دنسه اؤزومه وئردیییم سؤزو اونوتموشدوم. بیردن بیره اؤزومو بورادا داغ‌لارین اورتاسیندا داها دوغروسو اوجا بیر داغین اوجوندا تاپمیشدیم.

دوزونو دئسم، ائله‌بیل، قافلاندان ائله ده قورخمورام. بورالاردا قاباقجالار اوزاق‌لاردان آیی، چول دونقوزو، قورد، قارتال کیمی ییرتیجی جانلی‌لاردا گؤرموشم. البته، قافلانین داها ییرتیجی اولدوغونو دانماق اولماز. آنجاق، نه دئییم، منیم ده اورییمده بیر بوز قورد عینادی واردیر. آخی، ننه‌بابالاریمیزدان بیزه گلیب چاتان اسکی میف‌لره گؤره من ده بیر بوز قورد بالاسییام. بئله ایسه نییه گرک قافلان‌دان قورخمالی اولام؟ بیر ده، ائشیتدیییمه گؤره، قافلانین هئچ چوبانی ایله ایشی یوخوموش. یازیق قافلان آج اولدوغونا گؤره قویون سوروسونه وورموشدو. قارنینی دویورا بیله‌جک بیر قویونو سورودون آییریب آپاریب یئمک ایسته‌میشدی. سوچ چوباندا ایدی! بیر قویونون الدن گئتمه‌سینه راضیلاشا بیلمه‌میشدی...

ایندی اولان اولوب، کئچن کئچیبدی. داها گئرییه قاییتماق اولماز. ایندی من ائله او یاخین‌لاردا، لاپ ائله او یاخین‌لاردا، اوجا بیر داغین اوجوندا اوتورموشام. آیاق‌لاریمین آلتیندا یام-یاشیل یاماج‌لار، باشیمین اوستونده آغ-آپباق بولودلار، گؤزلریمین اؤنونده یام-یاشیل یاماج‌لارین اورتاسیندا گونشین هله اریده بیلمه‌دییی قارلار، قارشیمدان منه یاخینلاشان بولود مو دئییم چن می دئییم...

بورادا سیزلره داغچی اولمادیغیمی دا آچیقلامالییام. یوخسا بو یازینی اوخویاراق منیم داغچی اولدوغومو سانمیش اولا بیلرسینیز. دوزونو دئسم من ائله ده داغچی دئییلم. بوگونه دک یوکسلدیییم لاپ اوجا داغ، بابک قالاسی اولموش. نه‌دنسه اوندان سونرا بوتون داغ‌لاری آلچاق گؤرورم. آرتیق، لاپ یوخاری اوجوندا اوتوردوغوم ائله بو داغی دا بابک قالاسینین قارشیسیندا آلچاق بیر تپه کیمی گؤروروم. بلکه ده من یانیلیرام. آنجاق، یانیلسام دا بئله، دئدیییم کیمی، من بابک قالاسینی بوتون داغ‌لارین اوجوندان داها اوجا گؤرورم.

گؤردویونوز کیمی، سس‌سیزلییه دالمیش چئوره‌مده‌کی دینج‌لییه باخمایاراق، ایچیمده دینجلیییمی پوزان هر آن بیر فیرتینا قوپماقدادیر. دونیانین هر بیر یئرینده اولسام دا بئله، ایچیمده "هارای هارای من تورکم!" دئیه، بیر ده "هارای هارای من آذربایجانلییام" دئیه بیر باغیرتی واردیر. ائله‌دیر، ایل‌لردیر بوتون سس‌سیزلیک‌لری پوزان، بوتون سوسقون‌لوق‌لاری بوغان بیر باغیرتی واردیر ایچیمده!

چالوس جاداسی، کندوان گدییینین یاخین‌لیغیندا یئرله‌شن آدینی بیلمه‌دیییم اوجا، البته اوجالیقدا بابک قالاسینا چاتا بیلمه‌ین، بیر داغین اوجوندا