سمبلیک نسنه‌لر بیر میلتین اساس سرمایه‌لریندندیر و اونون اطرافیندا یارانمیش سؤیلم او میلتی گؤستره‌بیلیر. چین دوواری، ایفل بورجو و آزادلیق مجسمه‌سی منسوب اولدوقلاری خالقی تصویر ائدیرلر. دونیا شؤهرتلی ادوارد سعید، ۱۲ یاشیندا فیلیسطینی ترک ائتمیشدی. آما حیطلرینده اولان زئیتون آغاجی اونون خاطیره‌لرینی هئچ واخت ترک ائتمه‌میشدی. زئیتون آغاجی اونون یازیلاریندا سون درجه گؤزل و سون درجه نیسگیللی شکیلده یاشاییردی. منجه فیلیسطین خالقی «لیمون و زیتون» آغاجلارینی اؤزلرینه سیمگه ائدیب، اونلارلا ایلگیلی سؤیلم یارتماقدا اوغورلو اولوبلار. به هانسی آغاج بیزیم سیمگه‌میزه چئوریله‌بیلر؟ چینار، آردیج، سالخیم سؤیود، اریک، اییده، شام آغاجی بلکه ده توت آغاجی؟

قوپوز توت آغاجیندان دوزلیر و بوتون قوتسال یئرلرده توت اکیلیر، اما حاییف توت هر گلنه اگیلیر، چینار سینسادا بئله اگیلمیر. بیرده کی توت آغاجی یاریمچیق عشقین سیمگه‌سیدیر: توت آغاجی بویونجا/ توت یئمه‌دیم دویونجا/ یاری خلوتده گؤردوم/ دانیشمادین دویونجا.
کولتوروموزده اوچ آغاج بوتون آغاجلارین باشیندا دورور. باغچالار تیتره‌شیر باردان اؤته‌ری/ آلمادان، هئیوادان، ناردان اؤته‌ری. بونلارین ایچینده هئیوا هله یئتیشمه‌میش و گلمک واختی اولمایان عشقی گؤستریر. اوشاقلیق اویونلاریندا «آلما دئسم گل، هئیوا دئسم یوخ» دئیه‌رک گیزلنن دوستوموزا خبردارلیق وئرردیک و بایاتی‌دا «بو باغدا بار اولونجا/ هئیوالار نار اولونجا/ دیل آچار دلی گؤیلوم/ سن منه یار اولونجا» دئمیشیک.

آلما و نار هدف و عشقه چاتماغین علامتی‌دیر. تویدا اوغلان قیز باشیندان آلما آتار، بعضن ده «آلما آتار نار گلر، کتان کؤینک دار گلر». آلمانی قبول ائتمک عشقی قبول ائتمکدیر: آلما وئرسم آلمازسان/ سن آلمادان قالمازسان/ هانسی باغین گولوسن/ سارالمازسان، سولمازسان.
ناغیللاردا بیربیرنه بوت گلن سئوگیلی‌لر بیر آلمانین ایکی یاریسیندان یارنیبلار و اوشاقلارینی بیرلیگه چاغیران آتالار اونلاری یئددی نار چوبوغو ایله امتحانا چکیبلر و بیر نارین قیرخ دنه‌سیندن قیرخ قیز یارانیبدیر. بعضن نار آلمادان اوستون گلیر. آلتی سککیز راست دسگاهیندا بئله اوخونور: «مئیوه‌لرده اوچ مئیوه وار، اوچو ده بالام یئمه‌لی/ بیری آلما، بیری هئیوا، بیریسی نار/ آلما سنین، هئیوا دا سنین، نار منیم بالام، نار منیم».

نار یار اوچوندور، «باغا گیردیم نار اوچون، ناری دردیم یار اوچون/ یاریم بیوفا چیخدی، حئیفیم گلدی نار اوچون». آما آلما یارین اؤزودور، آلمانی درمک هدف و عشقه یئتیشمکدیر: آغاجدا آلما بئش اولار/ یئره دوشر اون‌بئش اولار/ اوغلان سئور، قیز خوش اولار/ قوی من اولوم آلما درن.

آغاجدا آلما کال اولار/ یئره دوشر خال-خال اولار/ اوغلان گولر، قیز لال اولار/ قوی من اولوم آلما درن.

ایندی سیزجه هانسی آغاج بیزیم سیمگه‌میزه چئوریله‌بیلر؟ آلما بیر یانا، نار دا بیر یانا، آما اوتایی بو تایا باغلایان آغاج اونودولماسین؛ اوتایلی‌سان گیله‌نار، بوتایلی‌سان گیله‌نار.