ام‌گلثوم رسول زاده (صادیق زاده)

ام‌گلثوم رسول زاده (صادیق زاده)، آذربایجان خالق جمهوریتی‌نین قوروجوسو محمد امین رسول زاده‌نین هم عمیسی قیزیدیر، همی ده بالدیزی. اونون قارداشی محمدعلی رسولزاده، رسولزاده قوردوغو جمهوریتین خالق پارلئمانی‌نین عضوو ایدی.

ام گلثومین شعرلری اقبال، آذربایجان و قورتولوش درگی‌لرینده چاپ اولوب. قورتولوش درگیسی نین حکایه یاریشیندا اونون حکایه‌سی مکافات آلیر. بورادان بو درگی‌نین رئداکتورو سید حسین صادیق‌زاده ایله تانیش اولدوقدا اونونلا ائولنیر. بوردان بویانا سوی آدی صادیق‌زاده اولور.

اری ۱۹۳۷ ده خالق دوشمنی آدی ایله حبس اولوندوقدا اونو دا اونون خانیمی اولدوغو اوچون موردووا ولایتینه ۷ ایل سورگون ائدیرلر. سورگوندن قاییداندان سونرا دا یئنه شاماخییا سورگون اولور.

اونون قیزی قومرال صادیق‌زاده سون منزل خزر اولدو رومانی‌نین مولفی اولاراق، آتاسی و آناسی‌نین حیاتینی یازیر. اوغلانلاری دا مشهور رسام اولموشلار.

شعرینه گلدیکده ایسه او داها چوخ ملت‌چی شعرلر یازیر. آذربایجان جمهوریتی دئوریلدیکده بایراق ائنرکن آدلی شعرینده بونو سئزمک اولور.

بو شعری ده حبس شعرلریندن‌دیر چوخ گومان. طبیعی کی اوندا کلاسیک ائلئمانلار چوخدور. خصوصیله قضوقدرچی اینانج و تفکر، اسکی شعرین قالیقلاری‌دیر. دیل باخیمیندان دا ائله بو اوسلوبون قالیقلاری شعره ده داخیل اولوب. سحر خانیمین فیکیرلرینه بو حاقدا قوشولورام. اؤزو یورولماز بیر شاعیر اولاراق طالعی‌نین چؤزولمه‌سینی متافیزیک قووه‌لرده گؤرمک ده ائله کلاسیک شعرین دوشونجه‌سی‌دیر. دئییلن‌لره گؤره قادین حاقلارینی برپا ائتمک اوزره سارسیلماز اراده‌ ایله مبارزه ائدیر. بونا گؤره ده سیدحسین صادیق‌زاده اوندان خوشو گلیر. اونونلا عایله قورور. همی ده جلیل محمد قلیزاده ایله ده تانیش ائدیر.